Tettare forsvarssamarbeid med Storbritannia

(NPK-NTB-Steinar Schjetne): Noreg og Storbritannia er i ferd med å utarbeide ein omfattande avtale om tettare samarbeid innan forsvar, tryggleik og etterretning, ifølgje forsvarsminister Tore O. Sandvik (Ap).

Noreg og Storbritannia går saman om å lage ein ny og omfattande avtale som skal styrkje forsvars- og tryggingssamarbeidet dei to landa imellom.

Mellom anna skal Noreg og Storbritannia samarbeide tettare om utvikling av forsvarskapasitetar, styrkje det strategiske samarbeidet i nordområda og trene meir på militære operasjonar i fellesskap.

Dei to landa bruker mange av dei same høgteknologiske våpensystema. Meir militær samtrening og meir effektivt operativt samarbeid, skal styrkje norsk og alliert forsvarsevne både til sjøs, til lands og i lufta, var bodskapen då Sandvik og den britiske kollegaen hans, John Healey, heldt pressekonferanse i Bodø torsdag ettermiddag.

– Naturleg å trekkje saman
Noreg og Storbritannia skal også styrkje samarbeidet innan etterretning.

– Derfor er det naturleg at vi knyter oss endå nærare til kvarandre for å styrkje eigen og alliert tryggleik og varetek dei felles strategiske interessene våre. Samtidig vil vi bidra til å gjere Nato sterkare, seier han.

Utsegnene kom på tampen av det to dagar lange nordområdebesøket til forsvarsminister John Healey. Bakgrunnen for møtet mellom dei to forsvarsministrane er mellom anna ei erkjenning av at dei europeiske landa må ta større ansvar for eigen tryggleik – i ei svært usikker tid, der USA ser ut til å vende meir av merksemda si mot Kina og Stillehavet.

– Slik situasjonen er no, er det nødvendig at Europa tek større ansvar for sin eigen tryggleik. Vi må koordinere oss betre og styrkje samarbeidet, sa forsvarsministeren til NTB onsdag.

Tiltak mot sabotasje
Under besøket sitt i Bodø torsdag fekk Healey og Sandvik ei omvising om bord på det britiske overvakingsskipet RFA «Proteus» og det norske overvakingsfartøyet KV «Bison».

Der fekk dei ein demonstrasjon av teknologi som det britiske og det norske forsvaret bruker for å overvake aktivitet under havoverflata, også djupt nede på havbotnen.

– Russland har i mange år halde oppe og utvikla vidare militære kapasitetar som kan ramme vestleg infrastruktur på djupt vatn. Denne typen kapasitet må vi rekne med at kan komme i bruk mot norsk infrastruktur ved ein meir spent situasjon eller konflikt, seier Sandvik.

Analysen er samanfallande med den som dei norske tryggingstenestene kom med i den nasjonale trussel- og risikovurderinga for to veker sidan: Det er sannsynleg at Russland ser seg tent med sabotasjeaksjonar mot mål i Noreg, og norskeigd energiinfrastruktur og Noregs militære bidrag til Ukraina er potensielle mål, ifølgje tryggingstenestene.

– Vi ser dykk
Sandvik påpeikar at Noreg og Storbritannia vil utvikle vidare samarbeidet om å kunne avdekkje og førebyggje vilja handlingar og sabotasje retta mot kritisk undersjøisk infrastruktur.

– Noreg og Storbritannia sit på høgteknologi som vi bruker kontinuerleg for å overvake og verne vår eigen undersjøiske infrastruktur. Den jobben gjer vi saman. Vi sender no ein heilt klar beskjed til alle som måtte ønskje å utføre sabotasje mot den undersjøiske infrastrukturen vår: Vi kan sjå dykk, seier han.

Noreg er auge og øyre for Nato og Europa i nordområda, poengterer Sandvik. I tillegg står vi overfor store investeringar i sjøforsvaret, med mellom anna kjøp av fem fregattar, seks ubåtar og «vi skal byggje mange nye standardfartøy».

– Sjølv om Russland har store tap på slagmarka i Ukraina, så er nordflåten og atomvåpenkapasitetane på Kola framleis intakt. Dei har stor kapasitet til å operere på havet og under havflata. Det er avgjerande for både norsk, britisk og amerikansk tryggleik at vi koordinerer innsatsen, sa han onsdag.