Tok imot kystruteskipet ved «heimekaia»

Tidleg måndag morgon litt etter klokka ni la Havila Capella til ved Mjølstadneset i Herøy. Mange var møtt opp med norske flagg og helsa skipet velkomen med hurrarop.

Følg AIS-sporinga frå skipet (ekstern lenke)

Det første skipet til Havila Kystruten la frå kai i Bergen søndag og skulle etter planen kome til Mjølstadneset ved 8.20-tida. Men på grunn av seine passasjerar og koronatesting, kom Havila Capella avgarde frå Bergen vel ein halv time etter planen.

Sjølv om kystruteskipet legg til på Mjølstadneset måndag, er den vanlege stoppestaden for seglasene framleis i Torvik.

Det er likevel ingen hemmelegheit at Havila-eigar Per Sævik gjerne ønsker å skifte stoppestad til Mjølstadneset i framtida.

Heile formannskapet i Herøy var invitert om bord under stoppet på Mjølstadneset. Eit stort pressekors var også om bord.

(saka held fram under)

Konkurranse for Hurtigruten
Havila Kystruten skal i alt få fire skip på strekninga, men dei to første har vore kraftig forseinka.

Hurtigruten skal trafikkere kystrutestrekninga med sju skip, og får for første gong konkurranse på strekninga.

Avtalane er inngått for perioden 2021–2030 med opsjon om å forlenge avtalen med eitt år. Den totale kontraktsummen er på til saman 788 millionar kroner i året.

Per Sævik seier at han er sikker på at satsinga vil verte godt tatt imot av folket langs kysten.

- Det har vore ein bratt oppoverbakke, men no ser vi framover. Vi er optimiske.

Nominert til berekraftpris
Reiarlaget har lagt vekt på at dei nye skipa dei sett inn på Bergen-Kirkenes er meir miljøvenlege enn dei konkurrenten Hurtigruten har i trafikk for augneblinken.

Kystruten-skipa skal segle på en kombinasjon av batteri og naturgass slik at CO2-utsleppa blir redusert med 25 prosent. Fartøya kan mellom anna segle opptil fire timar på batteri.

Førre veke blei det kjent at skipet er mellom dei nominerte til Nor-Shipping-prisen «Next Generation Ship Award».

Saka blir oppdatert