Trur på nytt godt år

I 2014 selde Ålesund-selskapet design og tenester for 127,1 millionar kroner, litt meir enn året før.
Resultatet før skatt vart på solide 31,3 millionar kroner, to millionar kroner mindre enn året før.
Adm. dir. Hans Ove Holmøy reknar med at 2015 vert like godt som fjoråret.
- Vi har som mål å oppnå tilsvarande tal som for 2014. Dette har vi naturligvis ikkje sikkerheit for enno, men mulegheitene for det ser gode ut.

Fiske og forsking

Selskapet har 41 årsverk og har siste tida signert ei rekkje nye kontraktar på nye fiskefartøy, i tillegg til tre kontraktar på indiske forskingsfartøy.

Satsar vidare i Tyrkia

Mange av dei Skipsteknisk-designa fiskefartøya har vorte bygde på Tersan-verftet i Tyrkia. I Istanbul har selskapet også eige designkontor.
Holmøy seier at dette vil ein halde fram med.
- Vi ventar ikkje store justeringar i antal tilsette i noko retning, seier han.

Åtte millionar i utbyte

I årsrapporten går det fram at både styret og adm. dir. er fornøgd med utviklinga i selskapet.
Eingenkapitalandelen er på 33 % og aksjonærane kan no fordele eit utbyte på åtte millionar kroner.
Største aksjonærar er Hans Ove Holmøy og Bjørn Oscar Kløvning med kvar 27,7 % av aksjane.
Andre aksjonærar er Kjell Jarle Holmøy (16,9 %), Robert Teige (15 %) og Karstein Teige (12,5 %).
Skipsteknisk er 100 % eigar av dotterselskapa Skan El og Skipsteknisk Engineering Tyrkia.
I tillegg eig selskapet 12,4 % i selskapet Frendtrawl.