Ulmatec sikra storkontrakt med Solstad

Ulmatec Handling Systems har signert ei ny storkontrakt med Solstad-reiarlaget som vil gi eit stort bidrag i å auka ordreboka framover.

Det opplyser salssjef Bjørn Gjerde til Nett No.

Leveransane gjeld sokalla LARS-system – som er ei engelsk forkorting for «launch and recovery»-system. Selskapet melde torsdag nyheita på sine heimesider og dei første to systema skal installerast på eit Solstad-skip.

Skal om bord på ein rekke skip
Hareid-selskapet har utvikla si eigen løysing kalla Ulmatec E-LARS som kan nyttast på ein rekke ulike skipssegment.

Utstyret gjer det mellom anna mogleg å utføre subseaoperasjonar med fjernstyrte undervassfarkostar i djupe farvatn.

Ulmatec vil ikkje opplyse kontraktsverdien på Solstad-avtalen, men Gjerde fortel at det dreiar seg om ein betydeleg mengde system som skal leverast i løpet av 2025 og 2026.

– Alle systema blir mobilisert om bord i Solstad sine fartøy, legg han til.

Rekordhøg ordreinngang i 2024
Ulmatec Handling Systems er ein del av Ulmatec-konsernet, og lagar både gangvegsystem, handteringsløysingar for bakdekk og utstyr til seismikksegmentet.

Selskapet la bak seg eit rekordår i 2023 med høg aktivitet og solid overskot.

Kommersiell direktør Bjørnar Nesset fortel at aktiviteten har halde fram å peike oppover i år.

– Ulmatec Handling Systems har rekordhøg ordreinngang i 2024, fortel han.

Leveranse på «Ship of the Year»
Ulmatec-selskapet har satsa betydelege ressursar på å utvikle sokalla «walk to work»-løysingar, som har slått an i marknaden.

Leveransen om bord på det aller første amerikanske skreddarsydde skipet for havvind, har vore ein ekstra fjør i hatten. Skipet Eco Edison blei nyleg kåra til «Ship of the Year» av amerikanske Professional Mariner's. Fartøyet er i arbeid utanfor kysten av New York.

Gangveg-system nummer to som skal leverast til den amerikanske kunden, er snart klart for testing hos Hareid-bedrifta, ifølgje Nesset.