Vard skal bygge tre vindskip

Vard stadfestar tysdag at tre serviceskip for vindkraft som North Star Renewables skal bygge, får design frå Vard.

Skipa skal også byggast ved Vard sitt verft i Vietnam.

NETT NO omtala før påske kontrakten som det Aberdeen-baserte selskapet blei tildelt frå Equinor, til ein verdi av kring 3,1 milliardar kroner. Dei tre skipa skal ut i arbeid på havvindparken Dogger Bank.

Administrerande direktør Matthew Gordon i North Star Renewables fortel i ei pressemelding at dei har jobba tett saman med Vard med å utvikle spesialskipa, og at designarbeidet oppfyller dei høgaste krava til funksjonalitet, komfort, tryggleik og berekraft.

Verdien på kontrakten for Vard blir ikkje opplyst.

Mykje Vard-utstyr om bord
Skipa vil få dieselelektrisk framdrift og batteriløysing om bord. Dei vil også ha avanserte gangvegar om bord med heis og trinnlaus gangveg til andre støttefartøy, i tillegg til ein 3D-kompensert kran for handtering av last.

Om bord blir det også ein rekke Seaq-løysingar frå Vard Electro i Tennfjord.

Det vil vere plass til mellom 60 og 78 personar på enkeltlugarar.

North Star Renewables har sikra seg 10-årskontrakter på havvindparken, som også inkluderer moglegheiter for lengre oppdrag. Dogger Bank-vindparken vil vere verdas største offshore vindpark når den står klar til bruk.

Skal leverast i 2023
Reiarsjef Gordon uttalar følgjande om den vidare prosessen i pressemeldinga:

«Det er spennende at disse designene nå skal over i byggefasen, og å fortsette den reisen med VARD er en naturlig forlengelse av vårt sterke samarbeid. Vi er sikre på at vi har en høykvalitets partner på design- og bygging som vil støtte oss i å bringe disse avanserte nye fartøyene ut i markedet.»

Skipa skal etter planen leverast 2023, blir det opplyst i pressemeldinga.