Vekst i luftige jobbar

Norwegiang Group-konsernet, med hovudkontor i Volda, har gått frå 80 millionar kroner i driftsinntekter i 2020 til 278 millionar kroner i 2022.

No har selskapet overtatt 31 tilsette frå Stavanger-selskapet Can i Stavanger, som gjekk konkurs i august. Det styrkar Norwegian Group si stilling i Stavangerområdet, gir dei tidlegare Can-tilsette ny jobb og viser at Norwegian Group er ein attraktiv arbeidsgivar, skriv Norwegian Group på Linkedin.

Klatreteknikk
Norwegian Group brukar klatre- og sikringteknikk frå fjellklatring for å kunne utføre arbeid på installasjonar og anlegg der stillas er dyrt og vanskeleg å ta i bruk.

I fjor fekk konsernet mellom anna oppdrag på Hywind Tampen, verdas første flytande vindpark til havs. Det er ein jobb som har gitt arbeid til omlag 50 personar frå fleire av datterselskapa i konsernet.

– Vi starta i mai i år, og vil truleg halde på til godt utpå hausten 2023, sa konsernleiar Kay Ove Johansen i Norwegian Group til NETT NO i fjor.

Vekst for Vertikalservice
Vertikalservice, som også har adresse i Volda, og driv same bransje, hadde ein kraftig vekst i fjor (sjå resultattabell under) og veks vidare i år.

I 2023 ligg driftsinntektene an til å bli 121 millionar kroner, sa grunnleggar, hovudaksjonær og driftsdirektør Åsmund Vaage til NETT NO i mars i år.

I fjor investere selskapet tungt i utvikling og kompetanseheving. Det gjorde at selskapet gjekk ut av 2022 med minusresultat, men investeringane betaler seg i år sa han.