Ventar klagestorm grunna lakseskatten

(NPK-NTB-Gunnhild Hokholt Bjerve): Fiskeridirektoratet ventar klagestorm frå oppdrettsnæringa når det nye normprisrådet startar opp neste år. Kapasiteten blir sprengd, fryktar direktoratet.

– Fiskeridirektoratet har fått uformelle førespurnader frå havbruksnæringa om at vi må forvente mange klager på vedtaket til normprisrådet. Klagesakseininga er per i dag ikkje dimensjonert for mange klager, skriv direktoratet i høyringssvaret sitt til regjeringa.

Dei trur dei vil få langt meir jobb med å følgje opp den nye lakseskatten enn det regjeringa har lagt opp til. Derfor ber direktoratet om ekstra løyvingar i budsjettet til at dei kan ha nok folk til å gjere jobben.

Klageorgan for prisråd
Fiskeridirektoratet er tiltenkt rolla både som sekretariat og klageorgan for det nye prisrådet, som skal fastsetje prisane som skal gjelde når grunnrenteskatten blir berekna. Rådet skal vere i sving frå neste år.

Regjeringa meiner direktoratet vil trenge 1–2 ekstra årsverk i sekretariatet. I tillegg vil det vere «behov for å styrkje klagesakseininga», skriv regjeringa i høyringsnotatet.

– Fiskeridirektoratet vurderer at det heilt klart vil vere høgare ressursbruk i ein oppstartsfase, og at det må setjast av ei ekstra løyving til å få ordninga i drift, er tilbakemeldinga.

Skal berekne marknadsprisen
Talerøyret til oppdrettsnæringa Sjømat Norge har kjempa hardt for å stoppe den nye grunnrenteskatten, som vart vedteken av Stortinget i vår. Det neste slaget står om korleis skatten skal bereknast. Regjeringa har foreslått at eit eige råd skal berekne marknadsprisen, basert på opplysningar frå oppdrettsselskapa og marknadsinformasjon.

– Høyringa om prisråd gjekk ut 4. september. No vil vi vurdere dei ulike innspela. Etter forslaget skal prisrådet fastsetje prisar for skatteformål frå januar 2024, seier statssekretær Erlend Grimstad (Sp) til NTB.

Departementet har ikkje svar på når dei vil sende forslaget sitt til Stortinget.

– Vil bli konflikt
Sjømat Noreg meiner uansett at det vil bli bråk når prisane skal fastsetjast av eit råd.

– Når næringa risikerer å bli pålagd å betale skatt på ei inntekt dei ikkje har, vil det bli konflikt og usemje. Det er ikkje til å unngå, seier leiar Geir Ove Ystmark til E24.

Regjeringa fryktar at selskapa vil tilpasse seg skatten. Oppdrettskonsern sel nemleg ofte fisken til seg sjølv fordi dei både driv med oppdrett og foredling. Dermed har dei full kontroll på prisane, til forskjell frå når fisken blir seld på ein open marknad.

Har fungert for oljebransjen
Regjeringa meiner eit prisråd vil løyse problemet og viser til at ei slik ordning har fungert for oljebransjen.

– Dette skal forenkle skattefastsetjinga både for havbruksselskapa og for styresmaktene samtidig som reelle prisar blir lagde til grunn, sa finansminister Trygve Slagsvold Vedum (Sp) då høyringsforslaget vart lagt fram.

Sjømat Noreg meiner internprisane bør leggjast til grunn og foreslår i staden etterkontrollar for å passe på at prisane er rette.

Skattestyresmaktene støttar prisråd
Skattedirektoratet er på si side positiv til regjeringsforslaget. Dei viser til at det blir vanskeleg for dei å vurdere om dei som kjøper og sel fisken, har eit «interessefellesskap». Då blir det vanskeleg å slå fast om prisane er dei same som om kjøpar og seljar har vore uavhengig av kvarandre, skriv direktoratet i innspelet sitt.

– Som departementet påpeikar, vil ei løysing som foreslått, virke ressurssparande, og Skattedirektoratet meiner eit uavhengig prisråd er eit godt verkemiddel for å motverke skattemotiverte tilpassingar, skriv dei.

Eit prisråd vil også gjere at det blir mindre fare for at inntekter og kostnader som ikkje skal reknast med i skattegrunnlaget, blir blanda inn, meiner direktoratet.

(©NPK)