Verftet i diskusjon om sluttoppgjer

Myklebust Verft er i diskusjon med ein kunde om sluttoppgjer for eit oppdrag. 

Det kjem fram i rekneskapen for verftsselskapet i Sande. 

Verftsdirektør Leiv Sindre Muren opplyser til Nett No at han ikkje vil seie meir enn den knappe informasjonen som kjem fram i årsmeldinga. 

Oppdraget gjekk over fleire år
I meldinga kjem det ikkje fram kva oppdrag det gjeld, kven kunden er – eller kor stor sum partane er usamde om. 

Det blir opplyst at det gjeld ei kontrakt der arbeidet har strekt seg over fleire år.

– Det er ikkje unormalt med mange pågåande prosjekt, at verftet har saker som står igjen å konkludere, opplyser Muren. 

I årsmeldinga blir det opplyst at det vil bli ei endeleg avgjerd etter at rekneskapen er levert. 

Nær dobling av omsetninga
Myklebust Verft fortalde i ei pressemelding nyleg om eit godt fjorår. 

Verftet var nær ved å doble omsetninga samanlikna med 2023.  Fasiten vart driftsinntekter på 817 millionar kroner – opp frå 420 millionar året før. 

Overskotet gjekk eit hakk ned frå 23 millionar kroner til drygt 18 millionar. 

Myklebust Verft-konsernet er eigd av selskapet Myklebust Verft Invest. Konsernrekneskapen viste ved utgangen av fjoråret ein eigenkapital på 182 millionar kroner og langsiktig gjeld på 71 millionar kroner.