Vil både auke CO2-avgifta og dempe kostnaden

I utkast til partiprogram for åra 2025-2029 skriv Høgre at partiet vil "fortsette opptrappingen av CO2-avgiftene, men kompensere ved å redusere andre skatter og avgifter og styrke virkemidlene for grønn omstilling.".

CO2-avgifta på diesel skal gjere drivstoffet så dyrt at fiskeflåten går over til andre energikjelder utan CO2-utslepp.

I takt med fallande torskekvoter har avgifta blitt eit heitt tema i fiskeripolitikken. Bransjen argumenterer med at avgifta er konkurransvridande fordi det er ei særnorsk avgift og at den fører til at havgåande fartøy vel å bunkre i utlandet for å unngå avgifta. Dessutan blir drivstoffet så dyrt at det minst lønsame fisket blir avvikla - på toppen av at den økonomisk viktige torskebestanden no er på retur og kvotene fell kraftig. I tillegg seier fiskarane at dei manglar alternativ til diesel.

Under Nor Fishing sa fiskeriminister Marianne Sivertsen Næss (Ap) at ho forsto fiskarkritikken mot CO2-avgifta.

– Eg kan som sagt ikkje forskottere noko framtidige regjeringsbehandling og konklusjonar, men frå min ståstad har eg i alle fall forstått bodskapen og kjem til å jobbe for å ta vare på lønsemda i denne næringa, sa Sivertsen Næss til Nett No.

Vil auke avgift
Samstundes som CO2-avgifta skal auke skriv Høgre i partiprogram-utkastet at partiet vil "legge til rette for et grønt skifte i fiskerinæringen, blant annet ved å utforme fiskeflåtens kompensasjonsordning for CO2-avgiften slik at konkurransekraften til norsk fiskerinæring kan opprettholdes i forhold til andre sammenlignbare land.

Høgre la fram utkastet mandag 9. september.

Nett No bad fiskeripolitisk talsperson i Høgre, Olve Grotle, om å utdjupe formuleringane i utkastet til partiprogram.

Dette er Grotle sitt svar:

"Formuleringa i utkastet til partiprogram knytt til CO2 om fiskeri er generelt utforma, men må framover utfyllast meir. Dette òg fordi saka er utvikling i næringa som vi må følgje med på.Vi er klar over at CO2-avgifta i dag er ei utfordring for store delar av fiskeriflåten, og ikkje minst fordi andre land ikkje har slik avgift. Det er derfor nødvendig at vi ser nærmare på desse utfordringane, og prøver å kome fram til ordningar som både kan stimulere til overgang til det grønne skiftet, samtidig som fiskeria må ha konkurransekraft og ikkje minst økonomisk høve til å fiske på dei ressursane vi har."

Utkastet til partiprogram er lagt ut på høyring.

God tid
I klimameldinga som regjeringa Solberg la fram i 2021, varsla den gradvis auke i avgifta på utslepp av CO2 fram til 2030. Avgifta skulle bli nesten fire gangar høgare, som vil bety omlag ei dobling av drivstoffkostnadane for fiskeflåten frå 2021-nivået.

Dåverande klima- og miljøvernminister Sveinung Rotevatn (V) meinte fiskarane hadde god tid.

– Det er ikkje veldig mange rammevilkår for ulike næringar som vi gir signal om ti år fram i tid. Eg kjem faktisk ikkje på eit einasta eitt, så det er i utgangspunktet ein god tidshorisont, sa Rotevatn til Nett No.