Vil ha fleire bedrifter på jobbmesse

Årets Bli Med Hit! jobbmesse i Oslo trekte truleg rekordmange besøkande til sentrumshotellet The Hub i hovudstaden. 

Av arbeidsgivarar var det derimot betydeleg færre aktørar enn tidlegare. Medan det var om lag 80 påmelde i fjor, var det i år kring 60 aktørar som stilte på stand for å rekruttere folk. 

– Eg har ingen god forklaring på kvifor det blei slik, og vi har fått veldig gode tilbakemeldingar på arrangementet så langt, fortel leiar Heidi Nakken i Næringsforeninga Ålesundregionen til Nett No. 

Nakken har likevel oppfatta at ein del bedrifter, som til eksempel er på jakt etter ingeniørar, er blitt meir spissa i rekrutteringa. Då vel dei kanskje vekk «breie» arrangement som Bli Med Hit! 

– Truleg er også fleire usikre på framtida, og held litt tilbake på rekrutteringa, legg ho til. 

– Håpar at fleire ser nytta
Ann Helen Krøvel er HR-sjef i Saferoad og meiner deltakinga frå næringslivet kunne vore høgare.  

– Vi vil gjerne ha med fleire bedrifter, og håpar at fleire ser nytta av å vere med, seier ho. 

Sjølv om selskapet ikkje hadde konkrete stillingar utlyste for augneblinken, har dei jamt behov for folk. 

– Vi har hatt mange innom i løpet av dagen som har signalisert at dei vil sende ope søknad. Eg meiner det er viktig å vere her, og vere synleg, legg ho til. 

HR-sjef Gunnhild Aarsæther på Vartdal Plast er samd med Krøvel. 

– Vi har vore med i fleire år og meiner dette er den beste jobbmessa så langt, seier ho.

– Meir flytteklare folk som kjem 
Arrangørane seier seg godt nøgd besøket under Bli Med Hit! i Oslo. 

– Vi hadde veldig godt besøk i år, og det var ei ganske vaksen gruppe, seier Heidi Nakken i næringsforeininga.

Blant dei besøkande på årets messe var det ein rekke nybakte foreldre som kom trillande med barnevogn.

– Dei første åra var det meir studentar som gjerne ville ha ein gratis lunsj som kom, men det er har utvikla seg. No er det meir flytteklare folk som kjem og vil heimover, seier Nakken.

– Eg håpar at rykta om tidenes beste Bli Med Hit! spreiar seg slik at bedriftene er tilbake i Oslo neste år, og at mange blir med til Trondheim til hausten, legg ho til.