NPK-NTB: Éin av fem oppgir at dei ikkje klarer å betale uventa utgifter utan å ta opp lån.

– 2023 var prega av auka rente- og prisnivå. Levekårsundersøkinga viser at andelen som oppgir å ikkje har råd til materielle og sosiale gode, har auka dei siste åra, og det same gjeld andelen med betalingsproblem, seier seniorrådgivar Håvard Bergesen Dalen i Statistisk sentralbyrå (SSB).

Klarer ikkje 20.000 kroner
Levekårsundersøkinga for fjoråret, som byrået står bak, viser at 20 prosent av befolkninga over 16 år ikkje klarte å betale ei uventa utgift på 20.000 kroner utan å ta opp lån eller selje gjenstandar.

Mest utbreidd er vanskane blant einslege.

I ei fersk undersøking som Fagforbundet har gjennomført blant medlemmene sine, oppgir heile éin av tre at dei slit med å betale ei uventa rekning på 10.000 kroner.

Bukostnadar veg tungt
Forbundet organiserer fleire lågtlønte yrkesgrupper. Bodskapen frå forbundsleiar Mette Nord er tydeleg i forkant av årets kommuneoppgjer som startar 15. april.

– Arbeidstakarane med låge inntekter slit mest med auka prisar og bekymringar for eigen økonomi. Dei bruker ein større del av lønna si på bustad, matvarer og straum. Vi må sikre at dei også i åra framover har nok til å leve, seier Nord til NTB.

Auka buutgifter er ifølgje SSB ei av årsakene til at dei økonomiske vanskane i befolkninga aukar.

I 2023 brukte éin av fem hushald minst 40 prosent av inntekta si på bustad, medan i 2021 var andelen 15 prosent.