Mindre futt i festen

ANALYSERegjeringa har fått ros frå økonomhald for legge fram eit budsjett som bidrar til minimal økonomisk vekst. Arbeidsløysa går ned og pilene peikar oppover. Tida er over for å kaste bensin på bålet, det brenn fint av seg sjølv.Den såkalla budsjettimpulsen, som er ein målestokk for kor mykje pengebruken regjeringa legg opp til i statsbudsjettet vil påverke økonomien, er nede i 0,1 prosent av BNP (brutto nasjonalprodukt).Det er lite, dette budsjettet skaper korkje meir fart i økonomien, eller bremsar den farta som er.Solberg-regjeringa nådde toppen i 2016, med ein budsjettimpuls på 0,7 prosent.Kritikken mot pengebruken frå resten av dei politiske partia har vore relativt laber undervegs. Det er ikkje så rart, meir til alle er gjerne ein god metode for å vinne veljarar. Opposisjonspartiet som med tyngde har leia an i debatten om kor stor bruk av oljepengane som er fornuftig ut frå omsynet til framtidige generasjonar og storleiken på offentleg sektor, mangla i den førre stortingsperioden.Regjeringa, med statsministeren i spissen, varsla på førehand at veksten i statsbudsjettet ikkje kom til å bli slik veljarane har vore vane etter at Høgre og Framstegspartiet tok over. Oljeprisfallet gjer at det ikkje er rom for på halde på som før heller, og no vil det dessutan skade norsk konkurranseutsette næringsliv om statens skal presse kostnadsnivået opp ved å auke konkurransen om arbeidskraft og kapasitet i næringslivet.Konsekvensen av det er at færre forventningar blir innfridd.Ferjefri E39 gjennom fylket, og spesielt mellom Hareid og Sula, er framleis først og fremst eit traseval - og lite anna. Dei mest optimistiske snakka om byggestart innan få år etter at Regjeringa kunngjorde kvar traseen skulle ligge. Den forhåpninga er det berre å gløyme.Det blei ikkje mykje pengar til betre standard på E39 mot Trondheim heilt nord i fylket, ei heller på E136 gjennom Romsdalen, to flaskehalsar -spesielt for godstransporten.Det kan hende saksbehandlinga på Stortinget kan flyte på nokre få milliardar og endre litt på prioriteringslistene. Men slik regjeringa spår at oljepris og økonomien vil utvikle seg blir budsjetta framover prega av tøffare prioriteringa. Kaka det skal delast på er framleis stor og veksande, men så lenge forventningane til storleiken på kakestykka er enda større vil det slite på dei som sit med makta.Difor blir det spennande å sjå korleis landbruksminister Jon Georg Dale (Frp) og kollegaene vil handere framlegget om å fjerna støtta til ei rekkje organisasjonar frå nyttår. I budsjettforslaget kuttar han overføringane over budsjettet til Landbruksdepartementet til meir enn 30 ulike organisasjonar. Til saman er det snakk om meir enn 30 millionar kroner.– På grunn av eit stramt budsjett har vi måtta prioritera strengt, seier Dale til NTB/NPK.Han argumenter mellom anna med at organisasjonane har hamna på tilskotslista basert på politisk skjønn og deretter blitt verande. Dale meiner tilskot basert på søknad om støtte til konkrete prosjekt vil vere ei betre ordning om det skal delast ut statleg støtte.Her blir det sikkert mykje bråk, og kanskje ein hestehandel der Dale gir etter på noko for å bidra til å få budsjettet i hamn. Men om ikkje oljeprisen går til himmels, eller viljen til å skattlegge folk og bedrifter aukar, så er dette det blir meir av i framtida. Det må prioriterast tøffare, og det går ut over nokon. Dale og Co burde sjølvsagt start jakta på kutt før, og kunne til dømes spart seg å auke pensjonen til gifte og sambuande pensjonistar frå 2016. Det var eit handslag til ei verdig, men ikkje til ei trengande gruppe.Prøv å gjere om på den endringa som kom i 2016, så vil du fort sjå at det er mykje vansklegare å ta frå nokon eit gode enn å dele det ut. Det vil nok Dale oppleve i striden som kjem om kutt i organisasjonsstøtta og.Med Ketil Solvik-Olsen som samferdselsminister i spissen har partiet både fått gjennom ei auka samferdselsatsing, men og skapt store forventningar om meir, som på Nordvestlandet først og fremst betyr veg. Men det er grenser der og. Nokon blir skuffa.Det vil vere eit meisterstykke å halde på oppslutninga når det må prioriterast strengare.