Bekymra for framtida til lutefisken

Det meiner stjernekokk Eirik Strøm Lillebø. Ny forsking viser at det å velje store fiskestykke kan gi ny giv for matretten.

Lutefisken blir sagt å vere over 500 år gammal, men den unike mattradisjonen er i fare for å døy ut, meiner Michelinstjerne-kokk Eirik Strøm Lillebø, som er medeigar i restaurantane Vaaghals og Code i Oslo.

– Det eg synest er forferdeleg, er at Noreg har nesten ingen matkultur. Vi har to store: Pinnekjøtt og lutefisk, seier Eirik Strøm Lillebø til NRK.

Kokken fryktar at viss vi ikkje lærer oss å lage god lutefisk heime, så mistar vi sjølvkjensle på det. Og til slutt så er det ingen som orkar å ete lutefisk lenger.

Nyleg bidrog Lillebø til lutefiskforsking ved universitet i Oslo. Der fekk han stadfesta hypotesen sin: om du opplever å få gelékonsistens på lutefisken, er det ikkje din feil men storleiken på fisken, viser forskinga.

I studien som Lillebø bidrog til, brukte dei fisk meint for restaurantane, frå same importør.

Fisken beheldt forma og vart ikkje til gelé, nesten same kva dei gjorde.

Derfor må forbrukarar sjå etter den største fisken, meiner han, og helst nakkestykka.

– Ein filet av lutefisk bør liggje på 2,2 til 2,4 kilo. Viss han er mindre enn det, og kjem ned i 1,4 og 1,6 kilo, som ofte butikkfisken er, så blir det ikkje bra, rett og slett, seier Lillebø.

Å velje store stykke kan dermed vere viktigare enn kva for ein oppskrift du går for.