Færre stengde apotek

NPK-NTB: Talet på stengde apotek er nesten halvert frå 21 førre torsdag til elleve denne veka. Samtidig har nesten 600.000 nordmenn byrja handle medisinar på nett.
– Førre veke var mange apotektilsette i karantene, mellom anna etter utanlandsreiser, seier administrerande direktør Per Lund i Apotekforeningen i ei pressemelding.
Han fortel at tilsette no blir lånte ut mellom apotek, og at farmasistudentar blir leigde inn.
– No ser det ut til at situasjonen i apoteka er meir normal, etter at dei mellom anna har fått på plass nye smitteverntiltak og rutinar, og kundetilstrøyminga i stor grad har gått tilbake til det meir vanlege.
Lund oppmodar kundane til å følgje råda frå styresmaktene om å halde ein til to meters avstand mellom kvarandre. Fleire apotek har òg innført avgrensingar på kor mange kundar som kan vere i apoteket samtidig.
– Ekstra viktig er det i apotek, der mange med andre sjukdommar ferdast, påpeikar han.
Han får støtte av det norske folket. Kvar fjerde nordmann er redd for å få koronasmitte på apoteket, ifølgje ei undersøking utført av YouGov for nettapoteket Farmasiet.
Undersøkinga viser òg at kvar fjerde nordmann meiner at alle i Noreg bør bestille medisinar på nett. Ytterlegare ein tredel meiner dei i risikogruppa bør unngå fysiske apotek, medan kvar tiande nordmann meiner det burde vere påbode å bestille på nett.
Nesten 600.000 nordmenn har byrja eller skal byrje å bestille medisinar på nett. Dermed handlar nesten like mange i nettapotek som i eit fysisk apotek.