NPK-NTB: Utlendingsdirektoratet (UDI) avdekte i fjor fleire hundre falske vitnemål i søknader om arbeidsløyve frå personar utanfor EØS-området.

I fjor vår byrja UDI å få unormalt mange søknader frå nokre få enkeltland. Felles for søknadene var at dei kom frå personar som hevda å ha utdanning og fagkunnskap innanfor dei same yrka.

– Då gjekk alarmen hos oss, seier einingsleiar Hind Dakhil opphaldsavdelinga i UDI til Aftenposten.

Det starta med søknader frå tyrkiske statsborgarar som etter seiande var kokkeutdanna. Undersøkingar avslørte at dei ikkje var kokkeutdanna og at vitnemål og andre dokument var falske.

Stikkprøvekontrollar av 20 søknader avdekte falske dokument i 11 av dei, ifølgje UDI. Mellom anna nytta påståtte bilmekanikarar frå India falske fagbrev og vitnemål i søknaden. I tillegg har UDI avslørt falske papir frå Iran og Kosovo.