- Fellesferien bør flyttast til mai/juni

NPK-NTB: I frykt for massekonkursar og høg arbeidsløyse foreslår økonomiprofessor Kjetil Storesletten å legge fellesferien til mai og juni.
– Det vi kunne gjort var å seie at dette går over innan mai eller juni. Etter det er det full fellesferie og skulestans. Viss alle heller tek ut ferien i mai eller juni, vil ein spare ganske mykje i permisjonspengar og få til meir verdiskaping, seier Storsletten til Dagens Næringsliv.
– Viss viruset gir seg i juli, kan ein få samfunnet i gang igjen, seier han.
Forslaget får støtte frå økonomiprofessorane Torfinn Harding og Andreas Moxnes, som også fryktar at store delar av norsk næringsliv blir utsletta dersom krisa varer lenge.
Harding peikar på at bruttonasjonalproduktet ville ha hatt godt av at ferien vart flytta.
– Vi blir sett tilbake i produksjon på grunn av nedstenginga, og å flytte ferien vil bøte på det. Det kan vere krevjande å få befolkninga til å klare å jobbe i juli, men det er sånne type tiltak vi må vurdere, seier Harding.
Moxnes meiner tiltaket kjøper Noreg tid til å utvide kapasiteten i helsevesenet og bidreg til å unngå dei negative konsekvensane av skulestenging.