Hegerberg skal hjelpe eksportnæringane

Helge Hegerberg skal arbeide med eit langsiktig omstillingsprogram for eksportnæringane i Møre og Romsdal, med vekt på rammevilkår.
Det opplyser Møre og Romsdal fylkeskommune i ei pressemelding.
Fylkestinget vedtok våren 2020 å auke innsatsen på langsiktig omstilling av næringslivet, med særleg vekt på eksportnæringane, som er svært viktige for sysselsetting og verdiskaping i fylket.
- Hegerberg har opparbeidd seg solid kunnskap om næringslivet gjennom sitt virke som næringslivsjournalist og som rådgivar olje og energi i Kristiansund kommune. Han er analytisk, strategisk, samarbeids- og løysingsorientert. I tillegg er han ein nettverksbyggar, og vi er svært glade for å få han med på laget, seier næringssjef Bergljot Landstad.
På lang sikt skal satsinga bidra til å styrke Møre og Romsdals næringspolitiske posisjon, omdømme og attraktivitet, og prosjektet skal søke samarbeid og deltaking også i nasjonale og internasjonale program.
- Prosjektet er viktig, og det er ei utfordring for meg å bli ein del av den langsiktige omstillinga av rammevilkåra for eksportnæringane. Eg ønskjer å spele på lag med ressursane i fylkeskommunen og med bransjar, klynger og institusjonar ute i regionen. Vi skapar lokalt og konkurrerer globalt, seier Hegerberg.
Helge Hegerberg har lang fartstid som journalist og redaktør i avishus og redaksjonar rundt om i landet. Frå 2013 har han vore rådgivar olje og energi i Kristiansund kommune. Han har også skrive fleire bøker om næringshistorie.
Prosjektleiarstillinga er eit engasjement i eitt år, med moglegheit for forlenging.