Kleven-kreditorar får truleg 40 prosent

Torsdag er det klart for gjeldsforhandling i Sunnmøre tingrett for selskapet Kleven Prosjekt 401, også kalla «Gamle Kleven Verft», ifølgje Vikebladet.

Selskapet har ikkje noko med dagens verftselskap å gjere, og blei oppretta hausten 2019 før dåverande Kleven Verft skulle seljast. Selskapet er eigd av Hurtigruten.

Ifølgje Henrik A. Christensen som er rådgjevar for Hurtigruten, fortel til avisa at forhandlingane blei fryst då koronapandemien slo til. Etter at prosessen har kome i gang har den vore ryddig, meiner han.

- Løysinga går ut på at kreditorane får 25 prosent av det uteståande beløpet no – og mellom 10 og 20 prosent i tilleggsutbetaling til sommaren. Så kreditorane får ikkje 100 prosent – men ei utbetaling på rundt rekna 40 prosent er ei god løysing slik situasjonen blei, fortel Christensen til avisa.

Den totale gjelda i selskapet er på kring 80 millionar kroner.