Kritiserer utviklinga i landbruket

(NPK): Stortingspolitikar Arne Nævra (SV) meiner det er kritikkverdig at delar av jordbruket går i retning av industrialisering.
– Ja, delar av det går i den retninga. Der areala blir større og besetningane blir større per eining. Og der effektivitetskravet skaper stadig større behov for ny og meir kostbar teknologi, seier Arne Nævra til .
Han peikar òg på at innsatsfaktorane har auka i takt med nye rasar og sortar, på grunn av avl og kryssingar, blant anna når det gjeld kunstgjødselbruk og kraftfôr.
Kritikken frå Nævra kom først fram i Bondebladet, i samband med ein film frå norske grisehus lagd av dyrevernsorganisasjonen Noah. Da peika han spesielt på dyrevelferda.
Tidlegare landbruksminister Sylvi Listhaug (Frp) dobla konsesjonsgrensa for kylling og kalkun og auka kvotetaket for mjølkeproduksjon, da ho sat i posisjon. Det meiner han er uheldig.
– Det er vel riktig å seie at det er i besetningane på gris og fjørfe at prosessen mot store einingar har komme lengst, seier Nævra.
Trass i at besetningane i mange produksjonar blir større og større, og at effektivitetskrava har auka så mykje, trur han husdyrbonden og den medvitne forbrukaren som er oppteken av dyrevelferd i Noreg, har felles interesser.
– Prisane må opp og klar merking av god dyrevelferd ville gjort at mange fleire ville betalt for det, seier han til Nationen.
(©NPK)