Meir jobb til Ulstein-verftet

Skroget til eit nytt vindskip til Bernhard Schulte Offshore kom tysdag til Ulstein verft. 

Skroget er bygd ved Crist-verftet  i Polen og blei slept inn Ulsteinfjorden i løpet av ettermiddagen. 

Skipet er det femte fartøyet Ulstein-konsernet har bygd for det tyske reiarlaget. Den første kontrakten blei inngått i 2015.

Nyleg blei også systerskipet sjøsett ved verftet etter å fått på plass første del av utrustninga inne i dokkhallen.  Begge skipa skal leverast i løpet av året. 

Skipa blir skreddarsydd for oppdrag i havvindindustrien og blir bygd for å kunne ta i bruk metanol som drivstoff. 

Om bord er den sokalla Twin X-Stern-løysinga frå Ulstein Design & Solutions, som betyr at skipet har baugfasong også i akterenden. Det blir kalla eit CSOV-fartøy, bygd for både konstruksjon og vedlikehaldsoppdrag.