I 2022 var prisane rekordhøge.

Gjennomsnittleg utsalspris inkludert skattar og avgifter for blyfri 95 i desember 2022 låg på 19,3 kroner, viser tal frå Statistisk sentralbyrå (SSB).

Det er ein nedgang på 8,3 prosent frå november, men ein auke på 9,8 prosent frå desember 2021. Pumpeprisen på diesel føyer seg inn i same mønster: 20,11 kroner literen er 10,3 prosent lågare enn i november, men framleis 20 prosent høgare enn same månad i 2021.

At pumpeprisen har vore uvanleg høg i 2022 har dei fleste merka, og toppen vart nådd med ein gjennomsnittspris på 26,16 kroner literen for ein liter bensin i juni.

Om ein reknar ut gjennomsnittet – altså legg saman gjennomsnittsprisane og delane av dei tolv månadene summen på tolv – landar ein på 21,78 kroner for bensin og 21,72 kroner for diesel.

Til samanlikning var gjennomsnittsprisen 16,52 kroner for bensin og 15,51 for diesel i 2021. Det betyr ein prisauke på 31,8 prosent for bensin og 40 prosent for diesel.

– I 2022 fekk ordet fylleangst ei ny betydning, for kvart stopp på ein bensinstasjon vart ein dyr affære. Dette er ei ekstraskattlegging av norske bilistar, som rammar hardast dei som har minst frå før. Dette kjem på toppen av auka prisar på straum og mat, og dessutan aukande rente, og er ikkje berekraftig i lengda, seier stortingsrepresentant Roy Steffensen (Frp).