Rentekutt hos bankane

Nordea, Danske Bank, Sparebank 1 SMN og DNB kuttar bustadlånrente, og gjer det enklare å få avdragsfridom.
Nordea set ned rentene på bustadlån for alle kundar med 0,5 prosentpoeng, medan renta for innskot blir sett ned med inntil 0,5 prosentpoeng.
– Noregs Bank har kunngjort eit ekstraordinært rentekutt, og vi er i ein ekstraordinær situasjon. Vi har vedteke at vi set ned rentene våre i lys av dette, seier leiar for personmarknaden, John Sætre, i Nordea Noreg.
Dei nye rentesatsane for eksisterande lån og innskot gjeld frå 29. april.

Avdragsfridom og rentekutt

Danske Bank kuttar bustadlånsrenta med inntil 0,35 prosentpoeng frå 15. april. Banken har òg merka ein markant auke i søknader om avdragsfridom på lån, opplyser landssjef Trond F. Mellingsæter i Danske Bank.
Dei gir no seks månaders avdragsfrie lån til dei som treng det, seier han. Banken kuttar òg endringsgebyret for slike tenester.
Sparebank 1 SMN set ned renta på bustadlån med inntil 0,35 prosentpoeng.
– I tillegg gjer vi det enklare for dei som har bustadlån, å søkje om avdragsfridom, seier konserndirektør Nelly Maske i Sparebank 1 SMN.

Styringsrenta ned

Renteendringa trer i kraft 23. mars for nye kundar og 30. april for eksisterande kundar.
DNB vedtok fredag å setje ned bustadlånsrenta med inntil 0,35 prosent og å gjere det lettare for kundar å få avdragsfrie lån.
Rentekuttet til bankane kjem etter at Noregs Bank fredag kutta styringsrenta med 0,5 prosentpoeng.