- Verste sidan krigen

NPK-NTB: Permisjonane den siste veka er åleine nok til å presse den registrerte arbeidsløysa i Noreg opp 1,6 prosentpoeng, åtvarar NHO.
Nav melde tysdag at det på fem dagar er kome inn 45.000 søknader om dagpengar ved permisjon.
Det åleine er nok til å presse den registrerte arbeidsløysa i Noreg opp frå 2,3 prosent i februar til 3,9 prosent no, påpeikar NHO-sjeføkonom Øystein Dørum.
– Og det er berre byrjinga. Dette er førstelinja. Det er flyselskapa, hotella og nokon av produksjonsbedriftene. Det er før vi har sett andre runde med verknader, seier Dørum til NTB.
Han fryktar at vi om ikkje lenge kan augne «den høgste arbeidsløysa etter krigen» i Noreg.
– Vi veit ikkje kor mange som vil permittere. Men det vi kan vere ganske sikre på, er at det i store delar av norsk næringsliv blir stillstand framover, seier Dørum.
– I den perioden, der vi er i dvale og ting går på sparebluss mange stader, vil det vere ekstremt viktig at vi held produksjonsstrukturen intakt og bedriftene flytande, åtvarar han.
Førre arbeidsløysetopp vart nådd sommaren 1993. Den gongen steig registrert arbeidsløyse i Noreg til over 6 prosent.
(©NPK)