Aurstad sikra gratis tunnelstein

Aurstad Tunnel har fått tilsegn om 80 000 kubikkmeter tunnelstein frå masselageret til Nordøyvegen sør på Fjørtofta, melder Møre og Romsdal fylkeskommune på si nettside.

Det er kring ein firedel av steinen ved masselageret og tunnelsteinen blir gitt bort mot at mottakaren sørger for transport.

Transporten vil ta tre månader
Til saman dreiar det seg om 4000 turar med semitrailer. Planen er å transportere 1000 kubikk tunnelstein om dagen i tre månader, og Ørsta-selskapet startar transporten første veka i september.

Fylkeskommunen kan i følge reguleringsplanen avhende stein frå masselageret sør på Fjørtofta fram til 2037. Det er også eit masselager nord på Fjørtofta.

(saka held fram under)

Øyane blei landfaste
Før helga blei Harøya, Fjørtofta, Flemsøy/Skuløy, Haramsøya og Lepsøya landfaste då den siste dekkestøypen på Laukebrua var ferdig.

Det skjedde torsdag, nøyaktig eitt år før den offisielle opninga av fastlandssambandet. Delar av vegen opnar allereie 18. september.

Etterlengta utviding
Tunnelsteinen frå Nordøyvegen skal Aurstad nytte til utviding av fiskerihamna ved Gjøsundet mellom Valderøya og Giske.

Giske er ei stor fiskerikommune, men ei skikkeleg hamn har vore eit sakn. Med statlege millionar i potten er no planane om ei utbygging av fiskerihamna i ferd med å realiserast.

Det blir lagt til rette for fleire kaier. Ferdig regulert hamneområde blir om lag 570 mål og kan seinare utvidast betydeleg, ifølgje Gjøsundhamn.no.