Børsdagen: Har brukt 41 millioner på eigne aksjar

Sju dagar i februar har Hav Group kjøpt aksjar i eige selskap og eig no 7,02 prosent av alle aksjane i selskapet.

Tilsaman 41,8 millionar kroner har selskapet brukt på aksjekjøp så langt, og det kan bli meir. Taket selskapet har sett er 10 prosent av aksjane.

Hovudformålet med aksjekjøpa er å ha aksjane som betaling-/byttemiddel ved kjøp eller samanslåingar med andre selskap. Aksjekjøpa er dermed eit varsl om at Hav Group vil vekse, også ved å legge nye selskap inn under Hav Group-paraplyen.

I dag steig Hav Group-aksjen 12,42 prosent, til 10,68 kroner aksjen, og vart dagens børsvinnar av dei børsnoterte selskapa på Nordvestlandet. Kursen verdset selskapet til 374 millionar kroner.

Det er framleis eit godt stykke opp til gjennomsnittskursen for aksjekjøpa Hav Group har gjort i eige selskap - 13,09 kroner aksjen. Men det er godt over botnnoteringa for selskapet, 8,40 kroner aksjen 26. januar i år.

Hav Group blei børsnotert i mars 2021, til kurs 14 kroner aksjen.

Selskapet vart skilt ut frå det som tidlegare var Havyard Group før børsnoteringa og består av fire ulike selskap; Norwegian Greentech med utstyr og system for handtering av ballastvatn, Hav Hydrogen med design og utstyr for bruk av hydrogen som energiberar ombord i skip, skipsdesignselskapet Hav Design og skipselektronikkselskapet Norwegian Electric Systems.

Havila Holding er største eigar med 24,97 prosent av aksjane.