Bygde brønnbåt på 12,5 månader

- Det har gått 12,5 månader frå kjølen vart strekt 15. oktober i fjor, til båten vert døypt i dag. Det er bra for ein så avansert båt, seier verftsdirektør Jarle Gunnarsein ved Sande-verftet.
Det er Rostein-reiarlaget på Harøya som har bestilt båten, som vert selskapet sin brønnbåt nummer elleve.
For fem år sidan leverte Larsnes Mek. Verksted brønnbåten "Ro Fjord" til Rostein, og Sande-verftet vart på nytt vald til å byggje det siste skipet.
- Vi har hatt eit godt samarbeid med Rostein, seier Jarle Gunnarstein.

Hektiske månader

Båten har vorte utrusta ved Sande-verftet, medan det var verftet Marine Project i polske Gdańsk som bygde skroget.
Gunnarstein opplyser at skroget eigentleg skulle vere ferdig i januar/februar, men kom først til Sande-verftet 9. juni.
- Det har vore nokre hektiske månader, og vi har klart å ta att mykje av det tapte, seier Gunnarstein.

Ingen tap

Han opplyser at verftet ikkje taper på forseinkinga.
- Nei, vi vert ikkje skadelidande, men vi har stått ekstra hardt på sidan reiarlaget har hatt fraktavtale på båten.
Den nye brønnbåten er designa i tett samarbeid mellom Rostein, Naviera Orca i Chile og Skipskompetanse i Måløy. Rostein-reiarlaget er medeigar i det chilenske reiarlaget Naviera Orcha.

Måløy-design

Prosjektet har medført fleire innovasjonar og vart i starten initiert som eit forprosjekt med støtte fra Innovasjon Norge - Sogn og Fjordane.
For Skipskompetanse i Måløy er prosjektet det hittil største for selskapet.
Kontrakten vart offentleggjort under havbruksmessa Aqua Nor i Trondheim i fjor.

Troms-oppdrag

Måløy-selskapet står bak leveranse av komplett design, klasse og produksjonspakke til Rostein. Det ligg også inne fleire opsjonar i kontrakten.
I ei pressemelding frå Rostein fredag vert det opplyst at båten i hovudsak vil frakte laks i Troms.
- "Ro Arctic" vil representere eit positivt bidrag og nye mulegheiter for våre øvrige kundar i nord-Norge.
- Rostein er stolte over å ytterleg forsterke sin posisjon i dette viktige området for oppdrettsnæringa og er trygg på at vi kan fortsette å bidra med kvalitetsrett og kostnadseffektive tenester til våre kundar i åra framover, skriv Rostein i meldinga.

Tyrkisk og spansk konkurranse

Larsnes Mek. Verksted har spesialisert seg på bygging av brønnbåtar og fiskefartøy, i tillegg til reperasjons- og vedlikehaldsarbeid.
Verftsdirektør Jarle Gunnarstein seier at verftet merkar auka konkurranse frå spanske og tyrkiske aktørar på bygging av fiskefartøy og brønnbåtar.
- Vi har ikkje nybyggingskontrakter klare no, men vi jobbar med mange spennande prosjekt, fortel han.
I påvente av nye kontrakter, vil Sande-verftet konsentrere seg om reperasjonsoppdrag og vedlikehaldsarbeid.
- Vi har bra med arbeid framover, seier Gunnarstein.

Pluss i fjor etter smell i 2012

Sande-verftet gjekk på ein smell i 2012, og hadde då eit resultat før skatt på minus 26,8 millionar kroner av ei omsetning på 339 millionar kroner.
I 2013 halverte omsetninga seg, men verftet tente på nytt pengar. Omsetninga stoppa på 162 millionar kroner, og resultatet før skatt vart pluss ti millionar kroner.