Båt nummer sju i Rem-flåten

- Ja, det stemmer, seier dagleg leiar Fredrik Remøy.
Han opplyser at Herøy-selskapet har fått ein treårig kontrakt med eit større seismikkselskap.
- Vi har ein særs kompetent organisasjon med lang erfaring innan seismisk operasjon, og det var derfor naturleg for oss å bygge vidare på dette fundamentet, seier Remøy.
Han opplyser at den aktive støtta frå aksjonærane har vore avgjerande for at selskapet kunne ta overlevering av dette skipet så raskt som ein gjorde.

Singapore-ombygging

No skal båten ombyggjast. Den operasjonen skal gjerast ved eit verft i Singapore. Mellom anna skal det om bord ein hangar.
- Dette verftet har gjort slike ombyggingar tidlegare. Sidan vi henta båten i Namibia, valde vi å gjere ombyggingsarbeidet i Singapore, seier Remøy.
Lewek Aquarius vart bygt ved Remontova-verftet i Polen i 2012.

- Godt kjøp

Etter det NETT NO kjenner til var nybyggingsprisen for båten på rundt 40 millionar USD.
- Og no vart båten kjøpt for vel ni millionar USD?
- Nei, det var nok litt meir, men det var eit godt kjøp, seier Remøy.
Båten er 87,9 meter lang og 18,8 meter brei, og har lugarkapasitet til 60 personar.
Skipet er eit såkalla Special Purpose skip, og eigar var eit selskap i Singapore.
Les pressemeldinga frå Remontova

Flåte på sju skip

Etter kjøpet av Lewek Aquarius har Rem Offshore sju fartøy. Frå før har selskapet PSV-ane Rem Mistral, Rem Mira, Rem Cetus og Rem Insula. I tillegg har ein subseaskipa Rem Saltire og Forland Inspector.
Bak Rem Offshore står Åge Remøy saman med islandske Thosteinn Mar Baldvinsson og svensk/sveitsiske Magnus Roth, som ønskjer å byggje opp eit større Herøy-basert offshoreselskap etter at Åge Remøy sitt tidlegare offshoreselskap vart overtatt av Røkke/Solstad.
- Vi er eit selskap i vekst og ser oss om etter nye moglegheiter, innan både seismikk og andre operasjonsområde, seier Fredrik Remøy.