Børsdagen: Dyre utlandsturar og høgare rente i sikte

Sjå børstabell for Nordvestlandet under

Utviklinga for selskapa frå Nordvestlandet på Oslo børs torsdag, inneheldt ikkje dei store svingingane.

Sjølv ein kansellert seglas for Havila Kystruten fekk ikkje aksjen – som allereie er på eit svært lågt nivå – til å falle meir enn 1,9 prosent.

Investorane verka først å reagere positivt på nyheita om ny kontrakt for Golden Energy Offshore Services.

Men reiarlaget fortalde også at dei fekk dårlegare betalt enn venta, og aksjen snudde ned og fall med nær ein prosent mot slutten av dagen.

Mange er truleg langt meir opptekne av kronekursen – som stadig peikar nedover mot dei fleste valutaene som betyr noko.

Torsdag morgon bikka euroen 12 norske kroner for første gong sidan mai i fjor. Ein må tilbake til pandemien for å finne eit tidspunkt der krona var svakare mot euroen, ifølgje Dagens Næringsliv.

Krona svekkja seg også mot andre valutaer, som amerikanske dollar og britiske pund.

Den svake norske kronekursen gjer at det kan bli ein dyr utanlandsferie for Ola og Kari Nordmann denne sommaren.

Situasjonen har ført til at fleire har teke til orde for renteauke, mellom dei økonomiprofessor Knut Anton Mork ved NTNU.

Ved førre rentemøte 19. juni heldt sentralbanken styringsrenta uendra på 4,5 prosent og signaliserte at ho truleg vil bli halden på det nivået ei god stund framover.

Mork påpeiker at svak krone gir dyrare importvarer, som kan gi høgare inflasjon her heime. Det kan føre til at Noregs Bank ikkje når inflasjonsmålet på to prosent.

Sjeføkonom i Handelsbanken, Marius Gonsholt Hov, trur også at vegen ned til inflasjonsmålet er lang med dagens svake kronekurs.

– I verste fall får vi ein ny renteauke. Den risikoen har vorte mykje større med den utviklinga som vi ser i kronekursen, seier han til TV 2.

Valuta- og rentemeklar Remy Atle Bilsback i Sparebanken Vest meiner derimot at kronesvekkinga truleg er forbigåande og vil balansere seg ut i august.

– I august er det rentemøte i Noregs Bank der det ligg til rette for at sentralbanken gjer tydeleg at ein kan gløyme rentekutt i år, seier Bilsback til NTB.

Oljeprisen som bidreg til å presse krona nedover, svekka seg litt i løpet av torsdagen. Ved stengetid blei eit fat handla for 80,33 dollar.

Hovudindeksen på Oslo børs fekk ein smell torsdag og enda med eit fall på 0,7 prosent til 1429,04 poeng.

Børstabell for Nordvestlandet: