Børsdagen: Jobbar med å løyse ut neste skip

Saka blir oppdatert

Havila Kystruten-aksjen blei sendt ned 13,64 prosent til 17,10 kroner onsdag. Reiarlaget blei dermed dagens soleklare tapar av børsnoterte selskap frå Nordvestlandet.

Utviklinga skjedde på lågt volum og det er ikkje sendt ut noko meldingar frå selskapet.

Elles var det mykje som endte i raudt i aksjemarknaden. Berre fire av 16 aksjar frå regionen auka i verdi onsdag (sjå tabell under).

Sævik på tur til Tyrkia
Havila Kystruten har i dag to skip i drift på den tradisjonsrike Bergen-Kirkenes-ruta, og skal snart sette inn to skip til.

Planen er framleis at skip nummer tre – Havila Polaris – skal segle frå Bergen 29. desember, stadfestar styreleiar Per Sævik til NETT NO på telefon frå Tyrkia.

– Den datoen står framleis ved lag. Båten er ikkje riktig ferdig, men det nærmar seg. Vi jobber no med å finne ut kva tid vi kan løyse ut skipet, seier Sævik.

Tidlegare er det opplyst at det fjerde skipet, Havila Pollux, vil vere klart i løpet av første kvartal neste og legge ut på jomfrutur seinast 22. mars.

Leverte nyleg minustal
Reiarlaget leverte tal for tredje kvartal den 29. november, som viste at selskapet framleis jobba med den nye finansieringa for alle fire skipa etter sanksjonsproblema.

Rekneskapen viste eit underskot på 109,5 millionar i kvartalet, som var det første med to skip i drift. Høge LNG-kostnader og utgifter knytt til opplæring, er mellom postane som tynger rekneskapen.

Havila Kystruten hadde størst auke i talet på tilsette av selskapa på Nordvestlandet i fjor. Ved utløpet av kvartalet var det 349 tilsette sjøfolk og 36 tilsette på land.

Oslo børs fekk ein ny tung dag med eit fall i hovudindeksen på 1,62 prosent til 1182,84.