Det blir trainee-program på Sunnmøre

I fjor haust bles Næringsforeningen Ålesundregionen liv i planane om å etablere ei eiga traineeordning på Sunnmøre, som eit rekrutteringstiltak for å lokke høgt utdanna til regionen. Då sa dagleg leiar Heidi Nakken i Næringsforeningen Ålesundregionen at ho måtte ha nok bedrifter med seg for å kome i gang.

No har ho det.

Avklaringa kom på eit teamsmøte mandag denne veka. 

– Vi har nok folk med til å konkludere: Ja, vi gjer det, seier Nakken. 

20 kandidatar
Nakken anslår at traineeprogrammet vil ha med rundt 20 kandidatar, fordelt på 16-22 bedrifter, når programmet startar i august i år. En del av bedriftene som er med kjem ikkje til å ta inn traineear før neste år, men blir med frå start for at programmet skal kome i gang.

Trainee-ordningar er eit rekrutteringsprogram der kandidatane arbeider eitt eller to år i ei bedrift.

Ordninga på Sunnmøre skal ha begge alternativa, og skal rekruttere folk med både bachelor- og mastergrad. 

Poenget er å både gjere seg kjend med ulike sider ved bedrifta og med næringslivet i regionen. 

Kompaniskap
Næringsforeningen Ålesundregionen har gått i kompaniskap med The Assessment Company for å etablere og drive trainee-programmet.

Rekrutteringsselskapet står allerede for det praktiske arbeidet med å gjennomføre eit tilsvarande trainee-program i Innlandet.

Heidi Nakken i Næringsforeningen sa i fjor at samarbeidet sparer næringsforeningen for å etablere ein eigen organisasjon og tilsette folk for å drive programmet. 

Korona stoppa forrige forsøk
Næringsforeningen har tidligare forsøkt å etablere eit trainee-program, men det var meir tidkrevende å få med bedrifter enn Næringsforeningen håpa. 

Og da ei mogleg lansering nærma seg, kom koronapandemien.

I mellomtida har næringsforeningen fått i gang Talent Sunnmøre, eit rekrutteringsprogram i mindre skala der nytilsette i bedriftene deltek på fleire samlingar i løpet av eitt år. Målet er både å utvikle seg i jobben og lære regionen og næringslivet her å kjenne. 

Les bakgrunn: