Dåp og folkefest 15. januar

I dag var kystruteskipet Havila Capella i Cartagena i Spania og fylte opp LNG-tankane. Planen er å vere framme i Bergen 22. november, og starte på den første seglinga til Kirkenes 1. desember.

- Det er mykje som skal på plass før 1. desember, men vi meiner vi skal klare det, seier adm. dir. Bent Martini i Havila Kystruten.

Viktig for heile regionen
Nokon dåpsseremoni vert det derimot ikkje under første turen.

- Nei, det ventar vi til 15. januar med. Då vert det stor folkefest i Fosnavåg. Vi håper at koronasituasjonen då er slik at vi også kan invitere til ope skip, seier Martini.

Gudmor vert Hege Sævik Rabben, medeigar og dotter til Liv og Per Sævik.

- Dette vert ein stor dag for eigarane og selskapet, men også ein stor dag for heile regionen. Det vil vi markere på ein skikkeleg måte, seier Martini.

Skrekkblanda fryd
På jomfruturen vert det likevel ein del mindre og større seremoniar undervegs.

- Vi skal halde ruta, men litt festivitas skal vi få tid til, seier Martini.

Han seier han gler seg.

- Men det er litt med skrekkblanda fryd. Det er mykje som skal på plass siste dagane.