– Eg er veldig glad for at vi har kome hit

Førstkomande måndag får offentlegheita vite kva grunnar det er for at formuesskatten er lovstridig, ifølgje fleire toppjuristar.

Då kallar Lars Oscar Øvstegård og hans allierte inn til pressekonferanse i Oslo for å legge fram det juridiske grunnlaget for korleis dei vil utfordre formuesskatten på arbeidande kapital i retten.

– Eg er veldig glad for at vi har kome hit, og at vi skal å høyre kva juristane har å seie, seier Øvstegård til Nett No.

– Handlar om dei små og mellomstore bedriftene
Som kjent har bedriftseigaren allereie jobba i kring to år med å førebu eit søksmål. Årsaka er at han meiner formuesskatten kan vere eit brot både på grunnlova, menneskerettane, FN-konvensjonen og konkurranselovgivinga.

– Vi er nøydd til å få løfta dette inn på ein arena der politikarane må snakke sant. Og ikkje spreie feilinformasjon og usanningar, seier han.

Øvstegård er sjølv eigar av ei lita bedrift. Han påpeiker at 98 prosent av næringslivet består av små og mellomstore selskap – men at desse sjeldan blir løfta fram av politikarar eller media.

– Politikarar synest openbart at det er mykje meir behageleg å gjere dette til ein milliardærdebatt, seier han – og avviser at det er tilfelle.

– Det er ei sak som i all hovudsak handlar om dei små og mellomstore bedriftene, legg han til.

Toppjuristar legg fram sine funn
Under pressekonferansen måndag vil professorane Mads Andenæs ved Universitetet i Oslo, mangeårig president i EFTA-domstolen Carl Baudenbacher og advokat Laura Baudenbacher, som er president for Sveits konkurransekommisjon, legge fram sine funn.

Dei har mellom anna greia ut korleis formuesskatt kan sjåast på som ei konfiskering av næringsdrivande sin eigedom på ein måte som grunnlova forbyr.

Juristane har også undersøkt korleis den norske formuesskatten skil seg ut negativt, samanlikna med skatt i andre land.

– Opplever at vi har fått enorm støtte
Øvstegård og støttespelarane har samla inn pengar via ein Spleis-aksjon for å betale for studien.

– Eg opplever at vi har fått enorm støtte i arbeidet, seier ørstingen.

Han har óg brukt betydelege summar av eiga lomme - og ei uttal timar - i arbeidet med å førebu søksmålet.

Ørstingen understrekar at dei i denne omgang i første rekke har teke i mot pengar frå små- og mellomstore bedrifter. Samtidig har dei fått støtteerklæringar frå fleire kapitalsterke personar, som gjer at han kjenner seg trygg på at dei har musklar til å stå løpet ut.

– Eg har også hatt enormt gode støttespelarar, ikkje minst i Spilka-sjef Terje Bøe og rekneskapsførar Geir Høydalsvik, legg Øvstegård til.