Fuglefjellet landa på Giske

- Starten på året har vore utfordrande på grunn av den utfordrande situasjonen innan offhorenæringa ettersom vi har halvparten av kundane våra i denne næringa, seier dagleg leiar Toivo Nilsen.
Han seier at selskapet har auka omsetninga litt innan møbel, fisk og akvakultur.
- Eg trur at og vi kjem til å levere eit balansert resultat for 2016, noko vi er godt fornøgd med dersom vi klarer.

Reindyrka filmselskap

Multimedieselskapet Fuglefjellet har drive med produksjon av film, interaktive salsapplikasjonar og 3D-visualisering. No har ein seld den interaktive delen, og vil reindyrke selskapet som eit filmselskap.
- Det er kjekt å skå at oppstarten til Agile interactive AS, som er vår utskilde/selde interaktiv-aktivitet, har fått ein grei start med oppdrag både for ABB og Kongsberg, seier Nilsen.

Giske-etablering

I februar flytta Fuglefjellet frå lokala sine i Molovegen i Ålesund til Øygardshavna på Giske. I den tidlegare møbelfabrikken er det ei rekkje selskap samla.
Fuglefjellet har slite med økonomien siste åra, og styre og administrasjon har sett i verk ei rekkje tiltak for å kutte kostnader. Å flytte til Giske er eitt av sparetiltaka.
Fuglefjellet omsette for 8,7 millionar kroner i fjor, og hadde eit resultat før skatt på minus 0,1 millionar. Det er opp frå minus 1,2 millionar i 2014.

Trondheim-eigd

Samstundes er eigenkapitalen positiv med 0,2 millionar kroner, og selskapet har redusert den langsiktige gjelda til 0,3 millionar.
Fuglefjellet har tolv tilsette og er heileigd av Trondheim-selskapet Greenway, som er eigd av Q Free-gründer Kai Bogen.