Gjeld på nær fem millionar etter byggkonkurs

Møre og Romsdal tingrett opna måndag konkurs i Bruaset Bygg etter at leiinga melde oppbod. Byggefirmaet med adresse i Måndalen har hatt ti tilsette, som ikkje er lovleg oppsagt.

Verksemda er no innstilt, ifølgje rettspapira.

Bustyrar er Ragnhild Camilla Pedersen og første skiftesamling i saka er 27. februar. Advokaten fortel til NETT NO at ho fekk oversendt papira måndag ettermiddag, og at ho førebels ikkje har fleire opplysningar i saka.

Blei starta opp i 2010
Selskapet har opplyst at den samla gjelda er på kring 4,8 millionar kroner, går det fram av avgjerda frå tingretten i Molde. Anslått verdi i selskapet er på drygt 400.000 kroner.

Byggefirmaet har vore i bransjen i meir enn ti år, og blei starta opp i 2010. Dei har mellom anna vore leverandør til det nye studentbygget i Ålesund.

Den siste offentlege rekneskapen frå 2021, viser ei omsetning på meir enn 17 millionar kroner. Det året hadde selskapet også 14 årsverk i arbeid.

Underskot og negativ eigenkapital
Lønnsemda har likevel vore svak og rekneskapane for 2017-2021 viser eit samla underskot på drygt to millionar kroner.

I rekneskapen frå 2021 påpeiker styret at selskapet har negativ eigenkapital, men at dei har opplevd ein god trend inn i 2022. Ordrereserven såg på det tidspunktet bra ut for fjoråret, og styret meinte det var grunnlag for vidare drift.