Går mot god sommar for Havila-hotella

- Ja, vi opnar 1. mai, og slik det ser ut til no vil vi halde ope til september - og muleg lenger dersom aktiviteten held fram så bra som det gjer i dag.

- Vi skal strekke sesongen så langt som muleg, men det er ikkje berekraftig å halde ope heile året.

Det seier reiselivsdirektør Gunther Dahler ved Sævik-eigde Havila Hotels.

Då Havila Hotels kjøpte det ærverdige hotellet i 2018, var målet å satse på heilårsdrift og blant anna leggje til rette for båtturisme på Hornindalsvatnet. Ein eigen hotellhage vart bygt, men sidan pandemien har hotellet med restaurant vore stengt i vintersesongen, noko som har skapt ein del reaksjonar lokalt.

- Proppa går når turistsesongen startar i Geiranger. Slik er det berre. Det ser vi på årets bookingar, der det er svært bra belegg frå medio mai og utover - noko som samstemmer med planlagt opning i Geiranger.

Kan igjen planlegge normalt
I år har det strøymd på med bestillingar, og rundt 80 prosent av kapasiteten er allereie vekkbestilt i sommar.

- Vi får ein bra sommarsesong. Det er utruleg gledeleg at vi er tilbake til å kunne planlegge og drive normal og forutsigbar hotelldrift igjen, seier Dahler.

Tidlegare har det vore utfordrande å få tak i tilsette som skal jobbe frå mai til oktober. No har ein teikna kontrakt med dei tilsette ein har behov for i Hornindal.

- Dette er i stor grad folk som jobbar på vinterhotella i vintersesongen, og no søker seg til sommarhotella, som Hotel Raftevold.

Ny hotelldirektør
Dahler seier at han har knytt til seg det han karakteriserer som ein framoverlent, positiv og hardtarbeidande direktør i Danijella Safer. Ho har vore tilsett i Havila Hotels i eitt års tid, og har tidlegare jobba for Dahler i fleire år.

- Dette er ein ressurs og kapasitet vi er veldig glad for å kunne bruke ved hotellet på Grodås denne sommaren.

Dahler seier at det vert jobba med nye tilbod til hotellgjestane. I tillegg håper han å få fleire grupper med cruiseturistar til å stoppe i Hornindal.

- Her jobbar vi med spennande planar.

Nordmenn bestiller tidlegare i Geiranger
Havila Hotels eig også Hotel Geiranger og Hotel Ivar Aasen i Ørsta. Gunther Dahler seier at det ser veldig bra ut for sommarsesongen ved Hotel Geiranger.

- Ja, her vert det god tilstrøyming av utanlandske gjestar, og vi ser at nordmenn er tidligere ute å bestille enn kva dei var før pandemien - noko som er gledeleg.

Har oppdaga Ørsta
Ved Hotel Ivar Aasen i Ørsta har ein tidlegare slite med få hotellgjestar om sommaren, men Dahler seier at ein har lukkast å få den utanlandske marknaden til å oppdage beliggenheita til Hotell Ivar Aasen.

- Dette er ein jobb vi starta for 4 - 5 år sidan, der vi bevisstgjorde den utaanlandske marknaden om den sentrale beliggenheita Ørsta har i forhold til alt det flotte man skal oppleve i vår region. Så her ser vi at fleire og fleire bur i fleire netter, og brukar hotellet som base for sine opplevingar i heile regionen.

Dahler seier at alt tyder på at ein i år vil vere tilbake på nivået ein var før pandemien ved dei tre hotella.

- Hittil ser det lovande ut.