Har plan B for å nå milliardmarknad

Ørsta-selskapet Arctic Bioscience hadde onsdag ein grundig presentasjon av resultata frå ein internasjonal studie av eit middel mot psoriasis. 

Då kom det fram at ny produksjonslinje ved ein fabrikk i Hovdebygda framleis er mellom måla til selskapet. Ei realisering er likevel avhengig av fleire faktorar. 

– Hovudmålet vårt er å lukkast med ei kommersialisering av middelet, fortel administrerande direktør Christer Valderhaug til Nett No. 

Den internasjonale studien har vart i eit heilt år og viser ein skilnad for pasientane. 

Forsøkspersonar som fekk middelet hadde betre resultat enn dei som fekk narremiddel. Samtidig er placebo-effekten framleis høg – og selskapet vil difor jobbe for å finne fram til ein anna metode i neste fase.

Milliardmarknad for legemiddel
Med resultata av studien i hamn, vil selskapet ta opp att samtaler dei har hatt med fleire legemiddelaktørar om å kome vidare. 

Det fall i smak hos investorane som sende aksjen på Oslo børs oppover.

Valderhaug fortalde under  presentasjonen onsdag, at han var trygg på at middelet ville nå marknaden. Samtidig understreka han potensialet – ein marknad på mellom 1,5 og 1,8 milliardar dollar. 

– Det er gjort grundige undersøkingar kring dette, og marknaden berre i USA er anslått til éin milliard dollar, seier han til Nett No. 

Har andre alternativ
Om ein snakkar om eit ferdig godkjent reseptbelagt legemiddel ligg dette framleis fleire år fram i tid. Men Valderhaug fortel at dei også har ein plan B. 

– Om vi ikkje får landa ein partnar som vil vere med å finansiere neste fase med å få godkjenning som legemiddel, vil vi vurdere andre moglegheiter for kommersialisering, seier han. 

Eit alternativ er å satse mot same pasientgruppe – men i «mellom-kategorien» omtala som medisinsk mat. 

– Då vil vi vere i marknaden fleire år tidlegare. Det vil ikkje nødvendigvis krevje fleire undersøkingar og vi kan samle det vi har, og søke om å få godkjent produktet i dei landa vi ønsker, seier Valderhaug. 

Ønsker eigen produksjon
Potensialet er likevel størst i marknaden for legemiddel på resept, som sikrar at pasientane får refusjon for utgiftene sine.

Undersøkinga som no er gjort, er ein sokalla fase 2-studie. Neste steg på veg mot eit godkjent legemiddel, er fase 3.

– Om vi får ein partnar på plass og går for fase 3, så vil vi sette opp ei produksjonslinje for å lage det vi treng til den fasa, seier Valderhaug. 

Det betyr i tilfelle ei realisering av fabrikken ved hovudkontoret  - ein plan selskapet sette på pause i 2022.

Avhengig av fleire faktorar
Valderhaug påpeiker at det er avhengig av finansiering – som dei vil ha med ein ny partnar på. Samtidig vil timinga vil avhenge av lønnsemda i marknaden for kosttilskot. 

Planen er at ei slik produksjonslinje, også kan lage kosttilskot – som i dag er hovudinntektskjelda til selskapet. 

– Vi har uansett eit sterkt ønske om å ha kontroll på produksjonen sjølv, seier Valderhaug. 

Samtidig vil nokre legemiddelfirma føretrekke å ta produksjonen sjølv. Val og forhandlingar med partnarar vil difor påverke dette.