Børsdagen: Arctic Bioscience-aksjen skaut opp

Sjå børstabell for Nordvestlandet under saka 

Investorane likte tydeleg oppdateringa frå Arctic Bioscience om ein stor internasjonal studie. 

Arctic Bioscience-aksjen skaut opp frå start på børsen onsdag. 

Selskapet fortalde tysdag om resultata i ein endeleg rapport frå ein stor internasjonal studie for sitt middel mot psoriasis. 

Sluttkursen tysdag var 3,42 kroner. I løpet av kort tid var kursen onsdag oppe i 4,80 kroner, før den sank tilbake til under 4 kroner aksjen og deretter steig mot slutten av dagen. 

Sluttkursen vart 4,20 kroner - ein oppgang på 22,81 prosent og 3. størst verdiauke på Oslo børs onsdag. 

Framleis er det likevel langt opp til nivået aksjen hadde før dei førebelse resultata frå studien kom i fjor haust. 

Arctic Bioscience i Hovdebygda i Ørsta starta opphaveleg som ein helsekostprodusent basert på silderogn, før selskapet byrja å arbeid med å utvikle eit middelt mot hudsjukdoment psoriasis - også det basert på silderogn.

Arctic Bioscience-sjef Christer Valderhaug fortalde under presentasjonen onsdag, at han var trygg på at middelet ville nå marknaden – men ikkje nødvendigvis med legemiddelgodkjenning. 

– For oss dannar dette eit godt grunnlag for å gå inn i hausten og fortsette partnardialogar, slik at vi kan få på plass ein eller fleire – for å utvikle HRO350 visare saman med oss, sa han under presentasjonen.

Til Nett No fortalde han at selskapet har ein plan B for å nå ut i milliardmarknaden som er anslått for middelet.

Den internasjonale studien har vart i eit heilt år og viser ein skilnad for pasientane. 

Forsøkspersonar som fekk middelet hadde betre resultat enn dei som fekk narremiddel. Samtidig er placebo-effekten framleis høg – og selskapet vil difor jobbe for å finne fram til ein anna metode i neste fase. 

Hovudindeksen på Oslo børs enda med ein oppgang på 0,69 prosent til 1619,37 poeng.  

Børstabell for Nordvestlandet: