Hard dom frå opposisjonen

(NPK-NTB-André Lorentsen): Opposisjonspartia på Stortinget er ikkje veldig imponert over dei varsla endringane i regjeringa i straumstøtta.

Frp er mest kritisk og meiner endringane er for puslete og kjem for seint.

Stortingsrepresentant Marius Arion Nilsen seier han fryktar norske straumkundar må venne seg til tyske straumprisar så lenge Arbeidarpartiet og Senterpartiet styrer landet.

– Dette held ikkje mål dersom vi skal unngå at innbyggjarar og næringsliv får tyske straumprisar dei neste åra, seier Nilsen.

Han seier Frp fleire gonger har foreslått å avgrense prissmitten gjennom utanlandskablane, innføre kraftige avgrensingar i krafteksporten og kompensere straumkundane fullt ut når prisane overstig 50 øre per kilowattime, men utan å bli høyrd.

Ola Elvestuen, som representerer Venstre i Stortingets energi- og miljøkomité, seier det er bra og rett med straumstøtte basert på timesprisene.

– Det blir eit system der rekninga samsvarer betre med pris, forbruk og den straumstøtta folk har krav på, seier han.

Men der stansar velviljen.

– Dette er berre brannsløkking. Det regjeringa no må prioritere, er å få på plass ei storstilt satsing på Enøktiltak. Når folk og bedrifter får tilgang på pengar til å energieffektivisere bustaden eller næringslokalet, kan dei få betre kontroll på straumforbruket sitt, seier Elvestuen.

Høgre vil ha meir kraftproduksjon
Høgres Nikolai Astrup meiner regjeringa har gjort forsvinnande lite for å auke kraftproduksjonen.

– Høgres mål er at rimeleg straum skal vere eit konkurransefortrinn for Noreg og eit gode for hushalda. Då må kraftproduksjonen aukast og nettutbygginga blir forsert.

Høgre er også bekymra for korleis dei høge straumrekningane slår ut for bedriftene.

– Fastprisavtalane har så langt ikkje levert i samsvar med behovet til bedriftene. Det er bra at regjeringa no innser at bedriftene treng meir fleksible avtalar. Men fram til fastprismarknaden skal komme ordentleg i gang, meiner Høgre det er behov for straumstøtte til utsette bedrifter gjennom denne vinteren.

KrF: Mageplask
Kjell Ingolf Ropstad, energipolitisk talsperson i KrF, kallar det heile eit mageplask.

– Dette innfrir på ingen måte dei forventningane som er skapte på førehand. Det er svært skuffande at regjeringa ikkje foreslår å betre straumstøtta med 100 prosent kompensasjon for prisar over 50 øre per kilowattime, slik KrF har foreslått.

Det kunne ifølgje Ropstad delvis finansiert med auka skatt for dei som tener meir enn 1 million kroner og som ikkje treng straumstøtte.

Raudt: – Småtteri
Stortingsrepresentant Sofie Marhaug, som er energipolitisk talsperson for Raudt, kallar endringane for «småtteri».

– Det mest konkrete grepet, straumstøtte berekna for kvar time, må dei til og med utsetje til hausten fordi dei har slite med å bestemme seg. Det er noko Raudt har meint lenge og som sist vart nedstemt i desember.

– At straumstøtta skal halde fram, skulle berre mangle. At dei ryddar opp i at fastprisavtalane skal ha fast volum, skulle også berre mangle, men det er trist at det kjem etter at nokre bedrifter har teikna sånne risikable avtalar, seier ho.

SV etterlyser strukturelle grep
Men støttepartiet til regjeringa, SV, er fornøgd. Mannen til partiet i energi- og miljøkomiteen, Lars Haltbrekken, seier dei er glade for den forsterka straumstøtta.

– Vi er glade for at regjeringa omsider kjem med ei forsterka straumstøtte. Mange slit med straumrekninga, og utfordringane har vorte større sidan det meste har vorte dyrare.

– No må vi sjå på strukturelle grep som gjer at vi får straumprisane ned og ikkje minst sikre gode støtteordningar for energisparing så fort som mogleg, seier Haltbrekken.

(©NPK)