- Skipet fekk skikkeleg prøve seg. Rapportane seier at det gjekk svært bra, men vi vart litt forseinka fram til Cartagena.
Det seier adm. dir. Bent Martini i Havila Kystruten.
1. desember skal Havila Capella, Havila Kystruten sitt første av fire skip, endeleg ta jomfruturen på strekninga Bergen – Kirkenes.
Startar forsiktig
Om bord vert det rundt 250 passasjerar og ein del inviterte gjester.
Total gjestekapasitet er 640, slik at ein startar med redusert kapasitet.
- Dette gjer vi heilt bevisst, seier Martini.
- Det er eit heilt nytt skip for mannskapet og servicepersonalet om bord, og vi aukar kapasiteten gradvis. I tillegg tar vi omsyn til smittesituasjonen.
Martini seier at selskapet kunne ha seld ut jomfruturen fleire gongar.
- Vi valde å stoppe bestillinga når vi hadde fått rundt 250 gjestar.
- Det vert ein god miks av nordmenn og utlendingar.
Det er eit visst stressnivå. Det merkast. Samstundes er det store forventningar
Ein del å rette på
Heller ikkje på andre rundturen vil ein køyre full kapasitet.
- Vi legg opp til å ha fullt skip på tredje turen, som går rundt juletider.
Om bord på turen frå byggjeverftet Tersan i Tyrkia til Bergen, er det rundt 110 personar.
- Dette er både mannskap og tilsette frå utstyrsleverandørane.
Martini seier at det har vore ein del å rette på, slik det alltid er med eit nytt skip.
- Men dei utfordringane vi har møtt, har vorte retta på undervegs.
(saka held fram under)
Les også
- Eit visst stressnivå
Han seier at det er eit omfattande arbeid som står att etter at skipet kjem fram til Bergen.
- Blant anna skal det om bord mykje utstyr, ikkje minst til hotelldelen. Det vert knapt med tid, men heile organisasjonen er innstilt på at vi skal klare det.
Martini seier at det er stor spenning framfor jomfruturen.
- Det er eit visst stressnivå. Det merkast. Samstundes er det store forventningar.
- Dette skal bli bra.
Første av fire
Havila Capella er første av fire skip frå Havila Kystruten. Det neste skal etter planen leverast før jul, dei to siste neste sommar.
Skipa er 124 meter lange, har 179 lugarar og ein total gjestekapasitet på 640.
Skipa går på LNG (flytande naturgass) og er i tillegg utstyrte med det som vert karakterisert som verdas største batteripakke.
Publisert: 16.11.2021 05:50
Sist oppdatert: 16.11.2021 07:18
