Havila overtek heile PSV-en

Havila Holding har inngått avtale med Eqva-selskapet Havyard Ship Invest om å kjøpe ein eigardel på 50 prosent i skipet Havila Charisma.

Det kjem fram i ei børsmelding frå Eqva tysdag.

Selskapet til Sævik-familien i Herøy betalar 62 millionar kroner for eigardelen i skipet som seglar i flåten til Havila Shipping. Fire millionar kroner er tilbakebetaling av gjeld.

På langtidskontrakt med Equinor
Den 2012-bygde PSV-en i flåten gjekk inn på langtidskontrakt med Equinor i 2021, med opsjon for vidare oppdrag. Skipet var eitt av fleire som i 2018 fekk installert batteri og landstrømsanlegg om bord.

Styreleiar Even Matre Ellingsen i Eqva uttaler i meldinga at salet frigjer viktige ressursar som gjer det mogleg å vidareutvikle selskapet sin industriportefølje.

Eqva, tidlegare Havyard Group, har nyleg flytta hovudkontoret frå Herøy til Kvinnherad.

Havila har fått inn betydelege summar
Sævik-familiens Havila Holding har som kjent fått inn betydelege summar dei siste månadene frå Fjord1-sal og sal av aksjane i Widerøe.

Styreleiar Vegard Sævik har tidlegare sagt til NETT NO at dei hadde tenkt til å betale ned gjeld i morselskapet, og at dei elles ikkje hadde planar om nye investeringar.

Nyleg blei det kjent at Sævik-selskapet også har refinansiert eit lån på kring 570 millionar og nye trekkfasilitetar på 200 millionar til Havila Kystruten.