Havyard Leirvik vil framleis bygge nytt

Sjølv om Havyard Group varsla at verftet i Sogn - etter store tap på fleire nybygg - skulle konsentrere seg om reparasjon, vedlikehald og ombygging, har verftet framleis eit ønskje om å også ta på seg nybyggingsoppdrag, ifølgje Smådal.

- Vi ser at der framleis er forespørslar på nybygg, seier ho til NETT NO, men kan - og vil ikkje svare på om verftet per i dag er i forhandlingar eller samtalar om nybyggingskontraktar.

Ombyggingsoppdrag
Måndag sende Havyard Group ut ei pressemelding om at verftet i Sogn skal bygge om ei ferje til el-ferje.

Det er Norled-ferja Ibestad som skal få elmotorar og batteri. Ferja trafikkerer strekninga Lyngseidet-Olderdalen over Lyngenfjorden, og vil etter ombygginga ha batteri som energiforsyningskjelde og dieselmotorar i reserve.

Ombygginga vil starte i august og skal vere ferdig i desember i år. Kva verftet får betalt er ikkje opplyst i pressemeldinga.

Undervegs varsla Havyard Group at verftet framover skulle satse på ombygging- og reparasjonsmarknaden. I fjor vart også anna verksemd enn skipsbygging skilt ut i eit nytt børsnoterte selskap, Hav Group, der Havyard Group er største eigar.