- Her fungerer alt perfekt

Med rundt 220 gjestar om bord, la Havila Castor, Havila Kystruten sitt andre skip, ut på jomfruturen i Bergen tysdag.

Om bord var også eit mannskap på 90, samt Havila Kystruten-direktør Bent Martini og Havila Kystruten-eigar Per Sævik.

Sjå video frå ankomsten i Herøy:

Lært av feila
Dei var strålande fornøgde med skipet etter at det var ein del tekniske problem då det første skipet, Havila Capella, vart sett i drift i desember i fjor.

- Vi har lært av feila med Havila Capella. Her om bord fungerer alt heilt perfekt, seier Bent Martini.

Han rosar dei tilsette som klarde å gjere skipet ferdig i løpet av fem dagar i Bergen.

- Ein heilt utruleg god innsats.

Høgare fart
Havila Capella gjekk med rundt 13 knop i snitt på turen frå Tersan-verftet i Tyrkia til Bergen, medan Havila Castor i snitt gjekk eit par knop raskare.

- I tillegg brukte vi mindre drivstoff. Vi har lært mykje undervegs, seier Martini.

- Sanksjonar kan ikkje stoppe skipet
Havila Capella er råka av sanksjonar, og har enno ikkje fått løyve av styresmaktene til å gjenoppta ruta mellom Bergen og Kirkenes.

På spørsmål om Martini kan love at Havila Castor vil gå inn i regulær rute, svarar han at alt ligg til rette for det.

- Denne skuta eig vi sjølv, og det er i alle fall ikkje sanksjonar som kan stoppe oss.

- God kjensle
Før ankomst Torvik onsdag, hadde Havila Castor eit lite stopp utanfor Havila Kystruten sitt hovedkvarter på Mjølstaneset. Mange hadde møtt fram for å helse nyeskuta velkomen.

- Utruleg gledeleg at vi endeleg er i gang med skip nummer to. Det gir ei god kjensle, spesielt når alt ser ut til å fungere som det skal, seier Per Sævik.