Her vert første Hywind Tampen-turbinen slept ut

Med Havila Shipping-skipet Havila Venus i front for slepet, er den første turbinen til Hywind Tampen på plass i Nordsjøen.

Torsdag morgon er dei fire skipa Havila Venus, Skandi Iceman, BB Octopus og Normand Sirius på veg med endå ein turbin.

Ut frå Gulen
Farta på slepet er akkurat no på berre 0,3 knop, viser tal frå Marine Traffic, men det er venta at alle dei elleve turbinane skal vere slepte ut og fast forankra i løpet av 55 døgn.

Slepa foregår ut Fensfjorden frå Wergeland Base i Gulen, der samanstillinga av vindturbinane har skjedd. Sjølve konstruksjonane er bygde hos Kværner Stord og Dommernes.

Equinor opplyser at vindparken vil kunne dekke om lag 35 prosent av det årlege elektriske kraftbehovet for dei fem plattformene Snorre A og B og Gullfaks A, B og C.

Stor djupne
Vindparken ligg om lag 140 kilometer ut frå kysten, der vassdjupna er mellom 260 og 300 meter.

Turbinane er monterte på flytande betongstrukturar med felles forankringssystem.

Kvar turbin har ein rotor på 167 meter i diameter og 81,5 meter lange blad.

Enova har støtta prosjektet med inntil 2,3 milliardar kroner. I tillegg har Equinor og partnerane fått 566 millionar kroner i støtte med næringslivets NOx-fond.

Delte meiningar
Prosjektet har vore omstridd. Blant anna har fiskarorganisasjonane vore kritiske. Equinor og partnerane har også møtt kritikk, blant anna frå SV, for å ikkje bidra meir med eigne midlar i prosjektet.

Tilhengarane viser derimot til at prosjektet opnar opp store nye industrimulegheiter i Norge innanfor ein rask veksande marknad for flytande havvind.

Det blir også vist til at prosjektet kan gi meir enn 200.000 tonn i reduserte CO2-utslepp per år, i tillegg til reduserte NO-utslepp på 1 000 tonn årleg.

Sjå video her.