Historisk godt år for Vartdal Plast

2019-rekneskapen i holdingselskapet til Vartdal Plast-konsernet viser eit historisk godt resultat.

Omsetninga auka med meir enn 100 millionar og resultat før skatt blei tredobla samanlikna med året før (sjå tabell til høgre – under om du les på mobil). Auken i driftsinntekter er på drygt 14 prosent.

- 2019 var eitt år då alt klaffa. Både når det gjaldt drift og sal, var fjoråret vårt beste år historisk sett, fortel dagleg leiar Jan Endre Vartdal i Ørsta-bedrifta til NETT NO.

Finansinntekter på nær 40 millionar kroner bidreg også til det gode resultatet for konsernet, ifølgje årsrapporten.

Jamn høg etterspurnad
Inntektene til Vartdal Plast kjem i første rekke frå produksjon av transportkasser for fisk og byggisolasjon i ekspanderbar polystyren (EPS).

- Vi jobbar i hovudsak innafor to segment – bygg og emballasje for fisk – og det er sjeldan at dei slår til samtidig. I fjor gjorde dei det. Vi hadde god produksjon og drift på fabrikkane. Samtidig fekk vi inn to nye fabrikkar som bidrog til å auke omsetninga, fortel Vartdal.

Medan etterspurnaden dei fleste åra går i bølgedalar, kunne maskinane «tute og gå» jamt i fjor.

– Med det resultatet vi leverte etter fjoråret, fekk vi også full effekt av korleis selskapet er bygd opp ved eigenkapital gjennom mange år, legg han til.

I snitt i løpet av fjoråret var det 56 tilsette i konsernet - tre fleire enn året før.

Full fart i byggebransjen
Då koronapandemien førte til at store delar av det norske og dei europeiske samfunna stengte ned, var det ei periode lågare etterspurnad etter fisk - og difor mindre å gjere for Vartdal-bedrifta.

– Det var hard jobbing for å halde maskineriet i gong, spesielt det å kapre dei kontraktane på byggmarknaden som vi trengde, seier Vartdal.

Dei låg litt bak budsjett før sommaren, men stor aktivitet i byggebransjen har gjort at dei no ligg an om lag som i fjor.

– Til vanleg går mesteparten av august utan at det er noko særleg fart i den marknaden. Men no rann ordrane inn heilt frå starten av månaden. Det er nesten litt uverkeleg å oppleve, fortel han.

Starta med resirkulering
I mai starta dei også opp resirkulering av kasser og emballasje av ESP, eller isopor, som det gjerne blir kalla i daglegtale. Bedrifta har investert i eit anlegg som skal komprimere EPS-en ved ein tidlegare møbelfabrikk på Liadal. Slik kan plastprodukta deira bli til nye produkt, i staden for at det blir avfall.

– Anlegget er i gong og vi har starta å eksportere komprimert EPS. Etter kvart har vi også begynt å få tilbake råstoff som er laga av den komprimerte EPS-en. Det kan vi nytte til å lage nytt råstoff og bruke innan bygg og teknisk emballasje som elektronikk, fortel han.

Snart har dei planar om å inviterte til offisiell opning med inviterte gjestar.

– Vi har også lyst til å ha ein fagleg del, der vi inviterer både politikarar og dei som har vore med å rydde strender, slik at dei også kan sjå at det skjer nye ting og det er moglegheiter til gjenvinning, fortel han.

Les også: Vartdal Plast kjøper Bodø-firma

Automatiserer lastebil-pakkinga

Brukt byggisolasjon og isopor blir nye arbeidsplassar

Synspunkt: Isopor er en miljøvennlig løsning