I år er forsvar tema på klyngekonferansen

Den maritime klynga på Nordvestlandet si rolle for forsvar og beredskap har fått ein eigen bolk, på klyngeorganisasjonen GCE Blue Maritime sin årlege klyngekonferanse, som i år blir arrangert onsdag 17. september.

Sjefen for sjøforsvaret, Kyrre Haugen, skal innleie om planane for sjøforsvaret framover og skal også delta i ein panelsamtale om den maritime klynga si rolle og betydning.

Les programmet her

Flytta frå NMK
På grunn av byggearbeid på NMK er årets klyngekonferanse flytta til Scandic Parken Hotel i Ålesund sentrum.

Talet på påmeldte hadde passert 150 tidlegare i veka og arrangøren ventar omlag 250 deltakarar, medrekna ei gruppe på 40 studentar.

Presentasjonen av tilstand og stemning blant bedriftene i maritim klynge er eit fast innslag på den maritime klyngekonferansen. Det er Menon Economics som gjennomfører analysen, og partnar Erik Jakobsen i analyseselskapet skal  presentere kva dei har funne.

Konkurransekraft
Hovudtema for årets konferansen er utviklinga i konkurransekrafta til bedriftene i maritime klynge. Konferansen skal både belyse korleis konkurransenkrafta har utvikla seg og gi døme på korleis den kan utviklast. 

I denne bolken på programmet vil mellom andre Gunvor Ulstein frå Ulstein Group og Gjermund Kvernmo Langset frå Bauta Group halde innlegg.