Ikkje skremt av svenske eigarar

Måndag blei dei tilsette i Brimer orientert om det komande eigarskiftet i bedrifta. Det svenske investeringsfondet Accent Equity kjøper Brimer frå Entec Group.

Steven P. Karunasmay er ingeniør og tillitsvald for dei organiserte i fagforeiningane Nito i Brimer.

Lokal leiing
Han er ikkje uroa over eigarskiftet og peikar på to positive faktorar:

• Eigarskiftet opnar for at Brimer vinn større innpass i utlandet.
• Leiinga, med Håvard Haanes i spissen, skal framleis vere lokal. 

Medan Karunasmay og ingeniørkollegaene sit i Ulsteinvik, har tillitsvald Terje Støylen i Fellesforbundet sine medlemer i fabrikken på Kvamsøya. 

– Veldig udramatisk, seier Støylen om eigarskiftet.

170 tilsette
Brimer lagar kar og tilhøyrande utstyr til mellom anna vassanlegg og til oppdrettsnæringa. Selskapet har omlag 170 tilsette med produksjonsanlegg i Latvia og på Kvamsøya. Omlag halvparten av dei tilsette arbeider i Noreg.

Accent Equity er per i dag eigar av 19 selskap før Brimer er rekna med. Investeringane spenner frå ei blomsterbutikk-kjede til trevareindustri og logistikkselskap.