Jaktar 50 statistar til bilfilm

Oppfølgjaren til kinosuksessen Børning startar innspeling i Fosnavåg i februar, og Herøy-baserte Verto Norge har i samarbeid med Herøy næringsforum fått oppdraget med å finne statistar. Dette opplyser Verto i ei pressemelding fredag.
– Vi treng minst 50 statistar til innspelinga som startar i Fosnavåg. Vil du ha ein sjanse til å vere med i ein stor norsk filmproduksjon, må du vere raskt ute, seier dagleg leiar Henning Karlsen i Verto.
Selskapet annonserer no etter statistar.

På vinterføre

Bilfilmen Børning var i 2014 ein av dei mest populære på norske kinoar, og forventningane til oppfølgjaren er store, seier Karlsen.
Regissør Hallvard Bræin har uttala at dette vert verdas første bilfilm på vinterføre.

- Fantastisk

Leiar Geir Idar Kvalsvik i Herøy næringsforum seier at det er fantastisk at Fosnavåg er valgt til sentral lokasjon i filmen.
- Regissørane synst naturen her er fantastisk, og mulegheitene for spektakulære scener er store.
- I tillegg vart det nemnd at bilmiljøet her ute i havgapet er flott, seier han i pressemeldinga.
Børning 2 kjem på kino til hausten