Jubilant med rekordoverskot

Den ferske rekneskapen til Libra-Plast viser nye rekordtal både på omsetning, overskot – og utbytte.

For første gong bikka inntektene over ein kvart milliard for selskapet som no er inne i sitt 70. driftsår.

253 millionar kroner i omsetning er ei auke på kring 15 prosent frå året før (sjå tabell under).

Selskapet har avvikande rekneskapsår som går frå april 2023 til mars 2024.

Rekordoverskot og -utbytte
Eit resultat før skatt på drygt 38 millionar kroner er det største Hareid-bedrifta har levert nokon gong. Finansinntekter på heile 18 millionar er med å dra opp lønnsemda kraftig.

Etter rekordåret blir det også teke ut eit rekordstort utbytte på 37 millionar kroner.

Selskapet hadde 36 tilsette ved utgangen av mars i år.

Ventar ny inntektsauke
Libra-Plast har spesialisert seg på produksjon av skipsutstyr, i hovudsak dører og luker.

Krigen i Ukraina og Midtausten skapar usikkerheit og forstyrringar i marknaden, skriv selskapet i årsmeldinga. Likevel er det budsjettert med auka inntekter for inneverande rekneskapsår.

Medan hovudkontor, salg og utvikling går føre seg på Hareid, skjer det meste av produksjonen i Latvia. Selskapet har óg hatt produksjon i Vietnam, men den vart avvikla i 2023.

Selt til svensk selskap
Etter stor pågang av friarar bestemte Libra-Plast-eigarane seg for å selje til det børsnoterte svenske selskapet Lagercrantz Group i 2021.

Brakali Group, som er eigd av familien Lillebø, var tidlegare hovudeigarar, og har framleis ein eigarpost på 16 prosent.

Lillebø-familien har mellom anna nytta kapitalen til å etablere ein ny møteplass, Millennium Co-Work, på Hareid.

Dagleg leiar Einar Pieroth eig også fem prosent i Libra-Plast.