Kjempefangstar ved Novaja Semlja

- Nei, så lenge vi ligg i så godt fiskeri og har kvote att, så vert det ikkje julefri i år heller.
Det seier skipper og reiar Åge Uran.
Om bord er det 16 mann. Fangsten på vel 500 tonn skal leverast i Båtsfjord 27. desember etter fire veker på feltet.
- Då vert det å gå tilbake til russesona. Der er ein god del fisk å sjå, seier Uran.

Jaktar snøkrabbe

Fangstinga skjer rekordlangt aust for norske fiskarar, heilt ved innløpet til Karahavet.
Uran opplyser at store mengder hyse og torsk er samla på relativt grynt vatn.
Delikatessa er snøkrabbe.
- Både torsken og hysa er heilt fulle av små snøkrabbar.

Stor fisk

Han seier at det er snakk om stor fisk.
- Ja, hysa er i snitt veldig stor. Isolert sett kan det gi litt bekymring at vi ikkje ser meir småhyse, seier han.
Tyrkia-bygde Leinebris dreg lina gjennom ein moonpool i kjølen.
Uran seier at fangstmetoden fungerer heilt fint.
- Vi driv med 63.000 krok i døgnet, utan noko problem.

Sikra meir kvoter

Vêret i området er også bra.
- Det som er av is, ligg lenger inne ved kysten.
- Vi har også litt lys, i alle fall er det delvis lyst rundt to timar for dag.
På grunn av det gode fiskeriet, har Leinebris også fylt opp med kvoter.
- Heldigvis har vi gode naboar på nordvestlandet, som hjelpte oss med dette, seier Uran.

Rosar mannskapet

Leinebris er eit resultat av samanslåinga mellom Herøy-reiarlaget Leinebris og Averøy-reiarlaget Urvaag, der ein samla kvotene på ein båt.
Paul Harald Leinebø i reiarlaget rosar mannskapet.
- Utan så dyktige folk om bord i alle ledd, hadde dette ikkje vore muleg. Det er snakk om krevjande farvatn å operere i.
- For oss er det første heile driftsåret med eigne kvoter, og no får vi ei strålande avslutning på året.
Båten er 58 meter lang og 13 meter brei, og kan fullasta ta rundt 550 tonn samla med filet og HG-fisk.