Kjempeoverskott for brønnbåtverft

Aas Mek. Verkstad leverer eit overskot etter fjoråret, som langt overgår alle tidlegare år, viser rekneskapen for 2023.

Verftet fekk eit resultat før skatt på 215 millionar. Det er om lag dobbelt så høgt som førre rekordår, tilbake i 2017. Dei siste åra har overskota vore mellom 70 og drygt 90 millionar.

Omsetninga gjekk samtidig ned i 2023 samanlikna med dei siste åra. Verftet kom frå tre år på rad med milliardomsetning, men i 2023 stoppa inntektene på 989 millionar (sjå tabell under).

Som kjent har verftet nyleg sikra seg avtaler om bygging av heile fire nye brønnbåtar, etter at det har vore stille i denne marknaden ei periode.

Utsiktene til auka aktivitet er difor god på litt sikt – og verftsleiinga fortalde til Nett No at dei ville ha behov for mange nye tilsette framover.

Det komande året vil det likevel vere utfordrande å klare å utnytte kapasiteten ved verftet fullt ut, heiter det i årsmeldinga frå verftet.

Aas Mek. Verkstad har levert brønnbåtar på rekke og rad dei siste åra, men i fjor vart det «berre» levert to brønnbåtar som følgje av brems frå lakseskatten.

No tyder alt på at Vestnes-verftet er gjennom dei utfordrande tidene som følgje av ordretørken. Etter å ha sikra dei fire nye kontraktane fortel selskapet om auka interesse for å bygge nye båtar.

– Det jobbast med prosjektering og tilbod på fleire ulike nybygg, og det er merkbart større interesse frå våre kundar for bestilling av nybygg, skriv leiinga i årsmeldinga.

Har sikra store utbytter
Vestnes-verftet har vorte svært god business for eigarane, som i 2020 til 2022 tok eit samla utbytte på 93 millionar kroner.

Etter superoverskotet i fjor, blir det overført 95 nye millionar i konsernbidrag frå verftsselskapet.

2023-rekneskapen for morselskapet Maritime Holding er ikkje klart frå Brønnøysundregistera enno. Storleiken på eit eventuelt utbytte i år, er difor ukjent.

Samtidig overfører verftsselskapet nær 73 millionar til eigenkapitalen, som ved utløpet av året var på 250 millionar. Den langsiktige gjelda var på drygt 45 millionar kroner. Konklusjonen til leiinga i årsrapporten overdriv ikkje: «Selskapets økonomiske situasjon er tilfredsstillende», heter det.